克羅地亞隆咁威！

猪拉多纳

聽朝喀麥隆對克羅地亞嘅A組賽事，用「此消彼長」嚟形容就最好不過！喀麥隆今鋪認真大鑊，佢哋出發踢世盃前因獎金問題搞到「罷工」，本身士氣已經唔掂，今場仲連頭號球星伊度奧都因傷唔踢得！反觀喺揭幕戰對巴西輸波贏掌聲嘅克羅地亞，就有王牌射手文迪蘇傑刑滿復出，今仗仲唔出盡全力搶分咩？「格仔兵團」讓半一，捧1.82倍上盤啦！

（TVB13及now818台、中央5台周四早上6:00直播）
飽受批評 球證唔敢再亂判

克羅地亞喺揭幕戰強戰東道主巴西，雖然同「森巴兵團」實力有差距，但最令人驚喜嘅係佢哋強敵當前，仍然毫無懼色，行軍比起單靠個人技術取勝嘅巴西更流暢，只可惜前鋒把握力不足，奧歷有技術但年事已高，謝拉域喺英超亦只係曇花一現……好彩，上仗停賽嘅文迪蘇傑（Mandzukic）聽朝刑滿復出，有佢喺前線做「Target Man」，配合極有機會傷愈披甲嘅中場大腦莫迪歷（Modric），組成「M & M」金鑽拍檔，鋒力絕對可以用恐怖嚟形容！

再講，「格仔軍」上仗鬥巴西出現極具爭議性嘅判決，令將帥非常不滿，克羅地亞媒體《晚報》就話國際足協因此飽受批評，剩低嗰兩場分組賽嘅執法球證，都應該會醒醒定定，該報更指領隊尼高高華非常擅長向球員作心理輔導，相信班「格仔兵」唔會受上仗嘅失利同早前「裸照門」事件影響，今仗定必全力搶走3分。
喀麥隆冇伊度奧 攻守都唔掂

唔知係咪同早前嘅獎金事件有關，喀麥隆上仗對墨西哥嘅表現，可以用慘不忍睹嚟形容，如果唔係球證「發雞盲」連續兩次誤判越位，墨西哥根本唔止贏1粒咁少。「不屈雄獅」上仗由組織攻勢到埋門，幾乎都係靠伊度奧一力承擔，不過有傷在身嘅佢，雖然尋日都有跟住大隊周圍貢，但一早都講咗話今場要有奇迹出現先可以落場，即係唔使預佢啦！睇怕喀麥隆今晚都要繼續做「送分童子」喇。
喀麥隆曾6次入圍

喀麥隆曾6次打入世盃決賽周，5次喺分組賽畢業，最叻嗰次入8強。

踢過21場決賽周賽事，錄得5勝7和9負，總共攻入19球，失35球。

喺02、10年決賽周分組賽，只取得1勝。

喺世盃決賽周總共有7位球員被逐。
1998年喜獲季軍

克羅地亞喺02、06年世盃分組賽只得1勝。

曾3次打入世盃決賽周，最佳成績係喺98年取得季軍，其餘2次喺分組賽畢業。

踢過14場決賽周賽事，錄得6勝2和6負，總共攻入16球，失14球。

喺歐洲區外圍賽10戰有5勝2和，共攻入12球。
博埋克羅地亞半W

急於搶分嘅克羅地亞相信會同上仗鬥巴西一樣，一開波就即刻搶攻，喀麥隆嘅防線上仗對墨西哥已經醜態百出，今仗對住有射手文迪蘇傑壓陣嘅「格仔軍團」，相信好快就會失波，克羅地亞個2.2倍半場勝捧得過。