烏拉圭英格蘭鬥攻格

猪拉多纳

大戰前夕互噴口水

死亡D組果然係名不虛傳，估唔到嚟到第2輪賽事，烏拉圭同英格蘭咁快就要上演一場「烏英生死戰」，今場呢兩支零分部隊打和攞1分絕對唔夠，為爭出線定會主攻求攞3分，兩軍球員賽前先上演一場「口水戰」，鬥講「今場一定要贏」，戰意夠晒鮮明，所以科娜一於撐雙方今場玩「大」佢﹗

（無綫翡翠台及明珠台、TVB 13及 19、now 818及840周五凌晨3時直播）
再冇退路和波攬住死

「烏英」皆喺首輪分組賽輸波而回，英格蘭輸畀意大利都唔算太意外，不過烏拉圭竟然喺最容易打嘅一仗爆大冷輸畀哥斯達黎加1比3，就真係好令人意外，兩軍全失3分後已被逼到牆角，今仗打和都可以話攬住死，雙方為爭出線只有一個目標，就係贏波！喺「烏英大戰」前夕，兩軍職球員先嚟一場「口水戰」熱下身，「烏圭」主帥泰巴尼斯就話會視呢場波為世盃決賽，一定要贏，而前鋒卡雲尼亦附和道：「我哋要將上場輸波拋諸腦後，依家唯一要做嘅係贏咗呢場波﹗」

不過「三獅軍團」亦唔輸蝕，眾將輪流開腔，先有隊長謝拉特力撐英軍嘅進攻可以撕開「烏圭」嘅防線，要擊敗佢哋唔係問題，而史杜列治亦話今場一定要贏：「若然其他戰果對我哋有利，咁和波可能都夠，但我喺利物浦學到嘅就係當機會把握喺我哋手上，我哋就要盡全力做好佢，而唔係求人哋幫你。」

兩隊喺賽前就大噴口水花，就知場波有幾激，不過講係唔夠嘅，要發揮出真正實力先夠，烏拉圭前線有傷愈復出嘅蘇亞雷斯拍卡雲尼，攻力當然不成問題，但防線先係最大隱憂，後衞彭利拿今場要坐波監，而中堅盧根奴既冇狀態又冇速度，面對英軍班後生仔，好易畀人爆完又爆，相信好難保持清白之身。
朗尼被換出 先發之選

英格蘭上仗對意大利放棄悶爆防守踢法，學晒利物浦玩進攻足球，搵史達寧、史杜列治、佐敦軒達臣呢幾個紅軍老鼠仔跑嚟跑去，節奏勁快，今場喺一定要贏嘅情況下料會繼續咁踢，大盤值捧。

另外，英格蘭前鋒朗尼上場表現乏善足陳，今場都好難大爆發，特別項目先發事件不妨買佢「被換出」。
英格蘭中場史達寧

英格蘭上場嘅最佳球員，速度、活力、創造力兼備，表現完全唔似只得19歲，進攻靠晒佢同史杜列治及韋碧克配合，即使踢到抽晒筋，比賽後段仍然係靠佢一個嘗試突破意大利嘅防線，今場唔Mark實佢，烏拉圭實會後悔。
烏拉圭後衞高甸

烏拉圭唔係淨係得前鋒入波，有咗「帶刀侍衞」高甸，球隊嘅死球戰術都好煞食。呢位中堅實而不華，成日「唔聲唔聲、嚇你一驚」，喺西甲最後一輪賽事，就係靠佢嘅一記頭槌入波，幫馬體會捧走冠軍。