阿蘇怒吼：我要屠獅！

猪拉多纳

得罪紅軍巴打 甘做英倫公敵

上季喺利物浦藉住超卓表現成功洗底嘅烏拉圭王牌前鋒蘇亞雷斯，今晚喺「死亡D組」次仗趕及傷愈復出救國，帶領烏拉圭火併英格蘭。講起呢場關乎出線嘅生死大戰，「哨牙蘇」豪言即使對住成班隊友都唔會畀面，仲話為贏呢場佢會不擇手段，即使重演4年前嘅「魔鬼之手」被世人唾罵都在所不計。如果佢今仗真係以一己之力砌低「三獅兵」，肯定會成為英倫公敵，來屆仲可唔可以留到喺英超都好成疑問。
爭勝心令佢離經叛道

烏拉圭王牌蘇亞雷斯被形容為「天使與魔鬼」混合體，佢有一種永不放棄嘅爭勝欲望，加埋精湛球技及射術，就算面對種種逆境，都成為其事業不斷向上嘅推動力。不過，正係呢種對勝利嘅飢渴感，令佢會經常做出一啲離經逆道嘅行為，如插水、咬人同種族歧視等醜聞屢見不鮮。早喺青年軍時代，蘇亞雷斯曾經施展「鐵頭功」頂撞球證，最出名嗰單當然係上屆世盃8強對加納，去到加時末段使出「魔鬼之手」，擋出對方嘅必入波，毫無體育精神可言，雖然佢被逐兼輸極刑，但因加納前鋒基恩宴客，最終烏拉圭捱到互射12碼仲射贏晉級，「哨牙蘇」由罪人變成國家英雄，真係難為正邪定分界。

過去一季，蘇亞雷斯猶如脫胎換骨，為利物浦於英超轟入31球助球隊成為亞軍，佢唔單止榮膺聯賽神射手，並當選雙料足球先生兩大殊榮，連同佢有牙齒印嘅曼聯後衞艾拉，都不計前嫌投佢一票，可見呢位以往喺英國嘅「過街老鼠」成功洗底。可惜，正值巔峰嘅蘇亞雷斯，卻喺備戰世盃期間意外受傷，烏拉圭仲要喺佢缺陣下，首仗落筆打三更輸畀哥斯達黎加，今晚與同樣首輪敗陣嘅英格蘭展開生死戰，烏軍都等住「哨牙蘇」復出救國。
100%康復 熟英軍路數

蘇亞雷斯視國家榮辱大過天，賽前佢親證已經百分百康復，隨時準備好上陣對英格蘭，更話佢比起任何國家隊隊友更熟悉英軍軍情，尤其係對謝拉特、史達寧、史杜列治等紅軍隊友更可謂瞭如指掌，知道點樣利用佢哋嘅弱點擊敗「三獅軍團」。幾經辛苦先成功洗底，假如今仗戰勝英格蘭，蘇亞雷斯隨時再成英倫公敵，但以佢超強爭勝鬥心，絕對唔會心慈手軟。

就連英格蘭主帥鶴臣賽前亦煞有介事咁話：「佢有潛質名留青史，但若想像比利、馬納當拿等經典球星齊名，就必須喺世界盃發熱發亮。」然而，乜都夠膽死嘅「哨牙蘇」，又點會怕鶴臣嘅心理戰呀？「三獅兵團」今晚如果嘜佢唔住，隨時提早執包袱。

1 英超係全球最高水平嘅聯賽之一，傳統上英格蘭出戰世界盃嘅大軍絕大多數來自英超球會。而今屆喺23人名單中，就只得1個非英超球員，佢就係効力蘇超些路迪嘅費沙科士打，但佢只係後備，至今只係幫國家隊上陣過2次咁大把。

3 睇番英格蘭資料，就唔難發現佢哋入波嘅方程式，對手就相對易於作出針對性部署，因為陣中只有3位球員為英格蘭射入超過10球，佢哋分別就係大家熟悉嘅朗尼（39球）、林柏特（29球）同謝拉特（21球）。

31 烏拉圭王牌射手蘇亞雷斯上季所有賽事合共為利物浦上陣37場，不過就驚人地入咗31球。事實上佢入球率極高，4年間為利物浦上陣125場入82個球，而之前亦為阿積士上陣159次則轟入111球。

26.1 烏拉圭王牌射手蘇亞雷斯上季所有賽事合共為利物浦上陣37場，不過就驚人地入咗31球。事實上佢入球率極高，4年間為利物浦上陣125場入82個球，而之前亦為阿積士上陣159次則轟入111球。

112 今屆英格蘭大軍名單中，隊長謝拉特係獲得喼帽次數最多嘅球員，達112頂，喺歷年英格蘭球員上場紀錄嘅名單上，只係比排第2，115頂嘅碧咸少3頂，如果英格蘭可以晉級16強，謝老四就好有機會超越碧咸。另現役國腳中排第2嘅係林柏特，已經擁有105頂喼帽。

111 烏拉圭老將科蘭係烏軍陣中經驗最豐富嘅球員，曾代表國家隊上陣111場，亦係唯一上陣破百嘅球員，比隊長盧根奴（95次）仲要多。

1132 烏拉圭今屆所有球員已經合共為國上陣1,132次，喺32支決賽周球隊中排第2，僅次於錄得1,375次嘅西班牙。而除咗佢哋兩隊同洪都拉斯（1,059次）之外，冇一隊球隊嘅總喼帽次數突破到1,000大關。