哥國領隊「被選總統」

猪拉多纳

哥倫比亞領隊柏加文競選總統？球隊上仗大勝希臘後，竟然有超過40萬人喺哥倫比亞總統選舉投票時，故意喺選票寫上呢位阿根廷籍主帥嘅大名，表示對佢嘅支持，認真誇張！

哥倫比亞相隔16年，再次喺世盃舞台獻技，舉國歡騰，超過10萬人湧入巴西，現場為國家隊打氣，身處國內嘅球迷就以另類方法支持。哥倫比亞贏波後，撞啱總統選舉，唔少選民「投」領隊柏加文一票，直接喺選票寫上佢嘅名，仲影相放上社交網，引起更多人效法，結果柏加文獲得超過40萬票，如果佢係哥倫比亞人，真係可以去選總統。