進攻風暴球迷之福

猪拉多纳

比賽多入波 易踢走睡魔

尋日朝早講完俄羅斯逼和南韓場波後，同Peter意猶未盡，一齊食早餐繼續講波經，因為32隊波全部亮晒相，帶畀我哋兩個好多思想上嘅衝擊，驚住一覺瞓醒唔記得晒，即刻坐低慢慢傾，所以默契都唔係話嚟就嚟，要經過長時間培養，尤其喺世界盃期間見皮蛋黃多過見屋企人。

評述有默契就喺講波時擦出火花，同樣球員有默契就令到觀眾有多啲入波睇！首輪16場分組賽一共轟入49球，場均入波率達到3.1球，暫時超越咗近三屆世界盃嘅入球率，對講波佬嚟講就係對條聲帶嘅考驗，唔通入波嘅時候仲好似隔夜油條咁咩，梗係大大聲嗌出嚟先有氣氛！
「尹飛人」金球暫時最靚

要升呢就要轉型求變，踢波同樣道理，以往球風保守嘅意大利同瑞士，近幾年已經變得鍾意進攻同積極，依家連哥斯達黎加同美國都踢得好放，希望繼續感染埋其他球隊一齊捲起進攻足球風暴，因為仲有乜嘢可以比得上梅花間竹嘅入波，去踢走球迷嘅睡魔呢？

晚晚做節目都要同觀眾玩問答遊戲，我問Peter「世界盃考眼光」到目前為止邊個入波最正？點知佢嘅答案同我不謀而合，十足十講波一樣唔使事先夾定嘅。答案就係尹佩斯飛身魚躍頭槌破網，講到呢度要去攞我嗰份炸魚柳早餐！