謝四蘇神 戰友變對頭

猪拉多纳

「烏英大戰」爆「紅軍內訌」？今晚D組分組賽重頭戲烏拉圭對英格蘭，烏拉圭王牌蘇亞雷斯強勢復出，呢位利物浦射手將硬碰一班紅軍隊友，包括被佢視為「最佳隊友」嘅謝拉特。不過「神奇隊長」話本來勁啱傾嘅「哨牙蘇」近日同佢玩冷戰，唔再覆佢Message，唔通真係為世界盃反目成仇？

利物浦上季喺英超戰績大躍進，最大功臣當然係謝拉特、蘇亞雷斯同史杜列治啦！不過今晚英格蘭對烏拉圭嘅大戰，就令呢個「3S組合」要暫時拆夥打對台，賽前「謝四」仲大吐苦水，話自己同老友鬼鬼嘅「蘇神」本來一直有用短訊保持聯絡，但「哨牙蘇」近日突然採取「只看不回」嘅態度，搞到「神奇隊長」超傷心，佢狂呻話：「我唔知佢依家傷勢點呀，佢都唔肯覆我，不過咁樣應該代表佢已經冇事喇！」
哨牙蘇唔覆謝拉特短訊

不過球迷唔好誤會紅軍因為一場世盃賽事就爆發內訌，其實蘇亞雷斯冇耐之前，先至透過英國《鏡報》公開大讚謝拉特係佢生涯之中嘅「最佳隊友」：「謝拉特對我影響好大，無論係對我嘅人生態度，定喺球場上，佢都好重要，尤其喺我面對問題嗰陣佢一直陪住我，我好感激佢。」相信蘇亞雷斯無啦啦玩冷戰，只係大戰前嘅權宜之計啫，各位利迷可以放心喇！
史杜列治︰「佢唔敢問我攞料」

至於蘇亞雷斯嘅「SAS」拍檔史杜列治亦非常關心對方，並祝福「蘇神」可以健健康康咁上陣，不過佢仍然不忘幽對方一默：「我諗佢唔敢問我攞料啩，我都唔會問佢囉！」今晚呢三位好兄弟同場較技，球迷就有好戲睇喇！
Data King：英格蘭6次交手2勝

‧英格蘭曾13次打入世盃決賽周，奪得1次冠軍。

‧踢過60場決賽周賽事，錄得26勝19和15負，總共攻入78球，失54球。

‧近2屆世盃決賽周6場分組賽中，共取得3勝3和成績。

‧近6次對鳥拉圭取得2勝2和2負。
乜都玩錦囊：蘇神攞牌易過入波

烏拉圭今場有射手蘇亞雷斯復出，佢出名射術好，但插水技術就更加係「蜚聲國際」，隨時未入波先因為畀球證捉到插水而攞牌，佢特別項目被罰黃牌有5倍，不妨試一試。