瑞士有料唔驚法國

猪拉多纳

各有3分 和波大家好

E組周六凌晨上演榜首戰，瑞士於薩爾瓦多新起源球場鬥法國。兩軍首輪同樣全取3分，形勢上今仗只要唔輸都可保住出線優勢，而且雙方對上三次國際賽碰頭均未分勝負，要讓波嘅法國冇甜頭可言，讓球主勝可捧，另外3.35倍和波亦可一試。

（TVB13及19、now 818及840周六凌晨3時直播）

兩軍今屆賽事都有好開始，法國輕描淡寫以3比0擊敗洪都拉斯，瑞士則靠補時絕殺2比1反勝厄瓜多爾，現時大家3分在手，贏波固然理想，不過Keep住唔輸對雙方嚟講可能更重要。因為假設較後時間開波嘅洪都拉斯對厄瓜多爾分出勝負，而瑞士、法國今仗各得1分嘅話，兩軍至少可以1分優勢進入最後一輪比賽，到時可以睇住嚟食。

記得上屆瑞士喺南非決賽周分組賽首場爆冷擊敗西班牙，點知去到第二輪卻不敵智利，結果踢完兩輪分組賽，瑞士和西班牙同得3分冇晒優勢，最終仲因為尾輪贏唔到洪都拉斯而提早執包袱，佢哋依家情況其實同上屆好相似，而且咁啱最尾一輪又係對番洪都拉斯，如果佢哋今次全失3分，上場努力分分鐘會付諸流水。

上輪賽前波童講過瑞士喺領隊希斯菲特帶領下，不敗率超過八成，上場能夠保住呢個佳績已係實力保證，而且佢哋對法國往績亦唔輸蝕，對上一次交手於06年世界盃，兩軍分別於外圍賽及決賽周對賽3次，結果3次同樣打和，就算如今兩軍已經面目全非，相信心理上亦對瑞士球員有幫助。
求好分博和波兼顧角球細

法國上場雖然大勝3球，不過如果唔係洪都拉斯柏拉西奧斯鹵莽犯規輸12碼兼被逐、連累球隊要十人應戰，法國未必可以贏得咁順，今次遇上實力、經驗均高洪都拉斯兩班嘅瑞士，料會遇上一定阻力，讓球主客和法國讓一球，可捧瑞士讓球主勝。另外，兩軍以往交手多和波，既然今次打和亦對雙方有利，想求好賠率不妨直取和局。其他投X方面，雙方預計會打穩陣波，捧角球細。
MARK實佢：瑞士後衞 列卡度洛迪古斯

列卡度洛迪古斯體力充沛，喺左路助攻助守，上場補時階段嘅絕殺入球就係靠佢喺左路傳中畀施費洛域射入，而且佢嘅遠射腳頭好厲害，隨時殺對手一個措手不及。
MARK實佢：法國前鋒 賓施馬

賓施馬上場梅開二度，Keep到早前熱身賽嘅勇態，如果唔係下半場嗰腳先射中門柱、然後再彈中對手門將入網計咗烏龍波，佢仲可以連中三元添，睇吓佢入場可唔可以入多幾粒爭上射手榜首位喇。
近三次對賽全部和波

兩隊近10年有4次於正式大賽碰面，04年歐國盃分組賽，法國憑施丹入波及亨利梅開二度，贏3比1。其後於世界盃外圍賽兩次交鋒，都打成平手，進入06年世界盃決賽周，又抽中同組，結果又和波，互交白卷，換言之近3次對賽皆打成平手。值得一提，06年世界盃分組賽，瑞士取得2勝1和，以首名出線，法國屈居次名。
手緊判官備受好評

古柏斯 Bjorn Kuipers

國籍：荷蘭　

年齡：41

曾執法大賽：歐聯、歐霸盃、12歐國盃、13洲際國家盃

簡介：古柏斯今屆世盃第2次登場，佢之前主吹英格蘭對意大利，只出示咗1張黃牌。事實上，本身喺荷蘭經營超級市場及髮型屋嘅古柏斯，一向執法好手緊，過往每場平均黃牌數亦唔過4張。佢上年主吹過歐霸盃及洲際國家盃決賽，表現備受好評，並獲著名球證網站《The Third Team》選為2013年最佳球證，有機會執法今屆世界盃決賽。

執法場數：82

黃牌數：300

紅牌數：17

判12碼：21

平均黃牌：3.65

平均紅牌數：0.20

平均判12碼次數：0.25
笛子波童推介：瑞士 讓球勝