世盃The Good,The Bad & The Ugly

猪拉多纳

智利驚喜 西班牙沒落 喀麥隆壞腦

世盃分組賽進行了20場，Peter想用荷里活明星奇連伊士活於60年代一套意大利片《The Good,The Bad & The Ugly》來形容三支球隊。「The Good」當然係表現出色嘅智利，佢哋以往被視為南美二線球隊，星味欠奉，但今屆帶來驚喜，領隊森柏奧利戰術有板有眼，射手阿歷斯山齊士演出獨當一面，門將哥迪奧巴禾把關穩健，令人眼前一亮。
迪亞高哥斯達名大於實

智利以2比0擊敗衞冕西班牙，提早取得出線資格，若然他們可以喺16強避開巴西，晉級8強應不成問題。至於「The Bad」當然指西班牙，其實球隊成績有起有落屬正常，Peter對於「鬥牛兵團」退步並不感奇怪，只覺得領隊迪保斯基今屆選人、排兵布陣比較耐人尋味，包括鋒線上重用迪亞高哥斯達，這位射手過去一季入波如拾草芥，好大程度因為馬體會戰術體系造就，論實力並非一位獨當一面的球員，若然轉投另一支球隊，可能只會變成費蘭度托利斯嘅「翻版」。

另外，迪保斯基首仗棄用查維馬天尼斯，上仗卻安排這位防守中場出任中堅，可謂楚才晉用。迪保斯基最敗筆是繼續信任門將卡斯拿斯，其實他於歐聯決賽已經明顯犯錯，慶幸有隊友補鑊。卡斯拿斯信心、狀態俱不足，能佔據一號門將位置實屬笑話，迪保斯基要為自己錯誤付出沉重代價。

「The Ugly」必定係喀麥隆，世盃揭幕前已因獎金鬧罷踢，兩仗對墨西哥及克羅地亞，表現乏善可陳，中場桑治無故向對手批（月爭）攞紅牌，球員於場上內訌，這種態度好唔要得，難怪阿仙奴雲格亦放棄他。