「鍵盤波友」陪住睇世盃

猪拉多纳

世界盃過咗一輪多啲，渡邊年主要喺屋企睇，不過隨住科技進步同社交網絡發達，每日世界盃「I've Never Watched Alone」。開波前你總會知道邊個朋友撐邊隊，因為佢哋會着波衫放上網，你又會知道佢哋有乜心水，因為有人會post下自己投X紀錄叫大家幫手打氣，你甚至會知道朋友睇波時食緊啲咩。

至於賽事途中，當每一個重要時刻，你都會搵到人即時討論，由尹佩斯海豚式入波、比比鹵莽領紅、狂牛半場輸兩粒，總能夠搵到朋友喺網上留言Update status，有感嘆、有理性分析、有Post足智彩投X注項攞威或哭波喪，渡邊年雖然有老婆喺屋企顧多辨，但有班朋友咁樣「陪」自己睇波，都可以作心理上安慰。

當然，如果有得同朋友一邊宵夜一邊睇波，就更加正啦，試諗吓，大杯酒大塊肉，粗口橫飛高談闊論，幾時都開心過做鍵盤波友。不過講時講，如果出街睇波就唔該唔好再玩電話喇，事關你班朋友就喺身邊！