法國新世代 生性做大「士」

猪拉多纳

首戰Hea住贏深不可測

新世代法國國家隊，今晚會同另一支歐洲勁旅瑞士合演E組榜首戰，雖然兩軍上仗都能夠開W，但論表現、論狀態，法國明顯贏瑞士幾條街，最重要係「高盧雞」冇咗列貝利，反而更Sharp醒，尤其係賓施馬同基沙文呢對「Bad Boy」拍檔，更加令我眼前一亮，所謂浪子回頭金不換，我梗係力撐生性從良嘅「賓基」啦，法國讓半一，捧2.08倍上盤！

（TVB13及now818台、中央5台周六凌晨3:00直播）

法國同瑞士喺今屆世盃都有個好開始，不過有睇波嘅球迷，都見到瑞士要出盡九牛二虎之力，先可以喺補時險勝厄瓜多爾，反而法國就輕輕鬆鬆，行住嚟踢炒洪都拉斯3蛋，若果唔係「法蘭西大軍」早早收韁，首戰佢哋贏夠5、6粒都冇難度，睇完呢場波，我只可以用4個字嚟形容呢隊法國隊：「深不可測」！
新星一大籮基沙文最有驚喜

依家嘅「高盧雞」大軍，絕對係年輕有活力兼潛質無限，超新星保羅普巴有幾勁唔使多講，最令我驚喜嘅反而係翼鋒基沙文！

呢位23歲嘅皇蘇球星，上仗雖然冇士哥，但佢嘅技術同速度拍得住列貝利之餘，活動範圍同氣力更比「拜仁國王」優勝，正正係因為基沙文不停跑動拉開敵軍防線，賓施馬先有咁多機會起腳入2粒，我都係前鋒，深知隊友走位引開敵衞係幾咁重要，家陣呢兩位壞孩子走埋一齊，反而產生咗化學作用，只要佢哋生生性性咪再搞事，法國絕對有能力走得更遠！
沙基利倚賴症！瑞士見晒底

除咗基沙文，法國仲有一大批極具潛質嘅新星，皇馬守將華拉尼、「紅軍」中堅馬馬度沙高、「新韋拉」馬度迪等等，個個都已經喺歐洲聯賽站穩陣腳，呢班人走埋一齊，成隊波真係好快好勁，我大膽預計，西班牙王朝已經正式沒落，呢幾年，好可能就係「法蘭西」嘅世界！

對家瑞士近年進步神速，主要原因唔係隊波嘅人腳勁咗，而係領隊希斯菲特堅有料到，用呢班氣力型球員用得非常恰當，不過正正由於瑞士係硬淨防守型球隊，上仗佢哋幾乎出盡十二成功力，先搞得掂厄瓜多爾，而且佢哋太過倚重翼鋒梳頓沙基利去造波，好易畀人睇通條路，所以佢哋上仗反勝厄瓜多爾，都係要靠兩件後備美密迪同施費洛域建功，依家連呢兩件秘密武器都揚咗，今晚憑咩頂得住弗到漏嘅法國先？
Data King：瑞士分組賽勝率50%

‧瑞士近3次同法國對賽皆和波收場，近4次皆開半場和。

‧近10場比賽成績為7勝2和1負。

‧踢過30場決賽周，錄10勝6和14負，總共攻入40球，失53球。

‧喺近2屆世盃決賽周分組賽當中，錄得3勝2和1負成績。
Data King：法國挑戰世盃100球

‧法國上場對洪都拉斯成功傳球率達87%，傳波準繩，中場玩晒。

‧近10場比賽取得8勝1和1負。

‧踢過55場決賽周，錄得26勝11和18負，總共攻入99球，失68球。

‧喺近2屆世盃決賽周分組賽當中，僅錄1勝3和2負。
乜都玩錦囊：法國出真「攻」夫捧大

法國首戰以3球輕取洪都拉斯，成隊波都未受考驗，相信呢場對手瑞士，先可以逼到佢哋出真功夫。既然兩隊鋒力都唔曳，好有可能上演入球騷。中位數2.5球嘅入球大細，入球大有1.95倍，絕對抵玩。