哥倫比亞夠爛打抵讚

猪拉多纳

沒有最失望，只有更失望，英格蘭又輸一場，好多英迷覺得好沮喪。英格蘭陣中球星如雲，但踢出九流成績，實在令人費解，整支球隊配合格格不入，好懷疑到底球隊內部係唔係有不和問題。踢波係高對抗性競技運動，鬥志非常重要，度士好欣賞哥倫比亞，呢班波冇球星但有拚勁，夠爛打一人行多一步，呢種打「盲拳」嘅球隊最難應付，進入淘汰賽後，相信冇對手想遇到哥倫比亞。

法卡奧受傷緣盡世盃後，哥倫比亞一度被睇淡，但事實剛好相反，愈踢愈起勁。佢哋首場大炒希臘，你可以話對手弱，但前晚擊敗非洲勁旅科特迪瓦，就充滿說服力，前中後三線組織緊密，防守硬朗，反擊夠快，兩位中場占士洛迪古斯、古達度非常活躍，令對手防不勝防，全隊好有活力。難怪科特迪瓦即使擁有耶耶托尼、杜奧巴等優秀球員，一樣頂唔住。
鶴臣毫無應變方案

至於英格蘭球員逐個秤，唔會比同組任何一隊差，但班波打出嚟嘅表現，反而變成最弱一隊。防守弱、埋門把握力差屬於表面問題，講到尾都係冇一套行之有效嘅整體戰術，首場輸畀意大利，上場又派番同樣正選陣容，領隊鶴臣似已黔驢技窮，毫無應變方案。所以就算符碌入到16強，亦難再進一步，倒不如早早出局，一切推倒重來，或會更有前途。