阿根廷強鋒 摧毀伊朗

猪拉多纳

球王發威！

美斯近半年成日畀人插冇態兼冇貨交，喺西甲輸咗個神射手畀C朗之餘，所屬球會巴塞又失落咗聯賽冠軍，相信「球王」一定谷埋成肚火，想喺世盃嚟個大爆發，威畀嗰班插佢嘅人睇！難得美斯上仗對波斯尼亞一搔8年之癢，入咗球靚波，信心返晒嚟，伊朗今場唔好彩啦！捧阿根廷讓2/2.5球嘅1.92倍上盤啦！

（TVB13及now818台、中央5台周日凌晨0:00直播）

阿根廷喺分組賽首戰以2:1擊敗波斯尼亞，雖然上半場嗰陣，美斯好似失咗蹤咁，完全無貨交，但去到下半場，領隊沙貝拉改一改個陣啫，美斯就即刻生猛番晒喇！
美斯破入球荒 信心返晒嚟

查實小妹認為要令美斯有表現，佢嘅隊友真係要搏命走動，得佢目標冇咁大先得。沙貝拉深明呢個道理，變一變陣後，阿古路、希古恩、迪馬利亞等等既可以自己搵食，又可以分散敵衞對美斯嘅注意力，掂呀！結果美斯咪即刻嚟料囉，第一個士哥就係「球王」開罰球製造出嚟嘅烏龍波，第二球就係美斯視5個波斯尼亞後衞如無物，單騎直入，終於打破8年入球荒！呢球波緊要咯，美斯唔單止證明咗自己已經醫好「世盃腳軟症」，仲大大提升信心，向世人證明球王已經回歸喇！
伊朗首戰執1分 全因對手曳

阿根廷今晚嘅對手伊朗，極有可能係世盃32強中最弱嘅一隊！呢支亞洲球隊首戰對尼日利亞玩死守，卒之如願守和0:0。嗰場波小妹都有睇，堅悶到爆囉，兩隊冇攻勢又冇睇頭，連交腳波都成問題，枉我仲犧牲「美容覺」捱夜，真係諗番都覺得後悔！查實有睇呢場悶戰嘅球迷，都會覺得尼日利亞根本係無心戀戰，小妹搵過料，原來「超霸鷹」嘅獎金勁奀，就算捧盃都係得79萬，所以成班球員咪求其Hea踢囉，伊朗因為咁先可以執到1分咋。但今晚伊朗嘅對手換上鬥心爆燈嘅阿根廷，以佢哋嘅「實力」，真係好易輸鑊甘，阿根廷讓到兩球兩球半，都要照捧！
Data King：伊朗傳波世盃最少

‧伊朗近10場比賽，取得5勝4和1負。

‧上場對尼日利亞成功傳球率只有62%，係決賽周32強中傳波最少嘅一隊。

‧踢過10場世盃決賽周賽事，錄得1勝3和6負，攻入6球，失18球。

‧中位數為2.5球，連續5場開入球細。
Data King：阿根廷中場玩晒

‧阿根廷上仗對波斯尼亞傳球成功率為84%。

‧近10場比賽取得7勝2和1負。

‧踢過70場世盃決賽周賽事，錄38勝14和20負，攻入125球，失81球。

‧77年對過伊朗1次，當時兩軍以1:1打成平手。
乜都玩錦囊：阿根廷變陣開「攻」大吉

阿根廷今輪對住同組實力最弱嘅伊朗，要大炒唔難，而且領隊沙貝拉有可能變陣，由首戰較為保守嘅532陣式，改為加強前線攻擊力嘅4312。面對呢條世界級鋒線，伊朗想輸少粒都難，入球大細開到3.5球，2.15倍嘅入球大都追得過。