智利哥軍當世典範

猪拉多纳

鶴臣無能 懷念藍西爵士

英格蘭貴為現代足球發源地，但自從1966年憑靴斯喺加時勁射判入波嘅問題球，喺主場奪得一次世盃後都未威過，唔通「三獅兵團」自此受到詛咒？係咩，唔係喎。Peter從來唔相信呢啲魔咒，輸波就要積極面對，查找不足再去改善，先會有美好嘅將來。今屆神奇球隊哥斯達黎加同智利，陣中大部分球員都名不見經傳，但兩軍領隊路爾斯賓圖及森柏奧利能夠物盡其用，面對強敵時作出針對性部署，踢出實而不華嘅足球，最終以蔗渣價錢、煮出燒鵝嘅味道，勇挫近兩屆盟主兼歐洲名牌意大利及西班牙，絕對值得學習。
鶴臣戰術保守冇氣魄

近年英倫三島嘅主帥嘅戰術水平偏低，英格蘭一度要搵外籍教頭艾歷臣同卡比路接掌兵符，梗係難以同冠軍主帥藍西爵士相提並論。1966年4-2-4及ＷＭ陣式大行其道之下，英格蘭領隊藍西改用革命性嘅4-4-2平衡陣式，其麾下不但有鋼門哥頓賓士，後防大將積查爾頓及卜比摩亞鎮守下固若金湯，後者亦有如西德著名自由人碧根鮑華般「大帝」級演出，中場既有卜比查爾頓、阿倫波爾等明星，亦有「跑狗」史泰爾斯做掃蕩，前線寧用不太起眼嘅亨特夥拍靴斯，亦棄用「英國姚卓然」占美基夫斯，因為藍帥深明「牡丹雖好亦要綠葉扶持」，個個都係球星好難踢出整體足球，促使藍帥力排眾議唔用占美基夫斯。

姑勿論靴斯個問題球係咪過白界，正係藍帥懂得因時制宜，注入攻守平衡嘅4-4-2陣式，無懼輿論壓力棄用大牌球星，終為「三獅兵團」登上世界之巔，呢種創新思維及用人氣魄，亦係保守嘅現任英軍主帥鶴臣所欠缺。