葡萄牙裝腔作細

猪拉多纳

基斯坦奴朗拿度靚仔、大隻，又好波，仲要有個鬼火咁靚嘅模特兒打令伊蓮娜，不知恨死幾多宅男。但係葡萄牙上場慘吞德國4蛋，C朗成場波冇影，掂波次數同龍門差唔多，難怪佢畀人寸係「大賽隱形俠」啦！葡萄牙聽朝面對實力一般嘅美國，兩軍都冇乜鋒力，隨時合演悶戰，捧1.88倍入球細最明智！

（TVB13及now818台、中央5台周一早上6:00直播）

C朗喺啱啱個球季相當威水，自己揮低宿敵美斯攞西甲神射手，又捧埋西班牙盃同歐聯冠軍。可惜吖，當佢着起國家隊波衫嗰陣，就變咗另外一個人，冇咗皇馬班星級隊友幫手，表現即刻打咗個5折，莫講話要帶領葡萄牙贏波，就連自己想入番粒都有難度！
葡軍5將缺陣 C朗紮住踢

最慘係C朗喺皇馬炒人就炒得多，畀人炒鑊甘就真係好少見，難怪葡萄牙吞德國4蛋嗰場波，C朗踢到鬼死咁躁啦，比賽期間仲畀電視台影到佢發老脾掟波砵添！咁都未算陰功，C朗日前仲被踢爆左膝依然有傷，要紮住練波，一個唔好彩，分分鐘會搞到收山，但都冇計吖，鬼叫葡萄牙冇人擔到大旗咩！最弊係除咗干查奧返咗葡萄牙祖家養傷，前鋒曉高艾美達又打埋柴，連中堅般奴艾維斯都唔多掂，另一一件守將比比又坐波監，普斯迪加又有些少唔妥，即係葡萄牙有成5位主力落唔到場，難怪美國中場、効力史浩克04嘅NBA狂迷鍾斯，賽前乘機寸爆葡萄牙，話佢哋好似熱火咁係一人球隊，唔使講，足球壇勒邦占士，就梗係C朗啦！
自大鍾斯 話美國似馬刺

之但係小妹橫睇掂睇，美國都唔似NBA總冠軍馬刺囉！你可以話「花旗兵」好似馬刺咁團結，但佢哋嘅個人質素真係不敢恭維，而且美國上場對加納雖然贏2:1，但主力丹普西畀對手踢爆咗個鼻，今戰要戴面罩落場，隨時影響發揮，另一件前鋒艾迪杜里又因傷倦勤，「花旗兵」仲憑咩學人喪攻先？好彩，佢哋家陣話晒都有3分在手，聽朝大可以玩死守戰術一心求和，咁嘅環境，呢場波分分鐘冇乜交收，入球細有1.88倍，抵捧吖！
Data King：美國首戰8射7中框

‧美國上仗對加納傳球成功率僅得66%。

‧首戰對加納8射7中，並且攻入2球，把握力有保證。

‧近10場比賽錄得6勝2和2負。

‧踢過30場世盃決賽周賽事，錄得8勝5和17負，攻入41球，失27球。
Data King：葡萄牙近10戰6勝

‧葡萄牙近10場比賽，取得6勝2和2負。

‧曾5鬥美國，結果葡萄牙取得2勝1和2負。

‧上場對德國共有14次射門，基斯坦奴朗拿度佔7次。

‧踢過24場世盃決賽周賽事，錄12勝3和9負，攻入39球，失26球。
乜都玩錦囊：博C朗總入球1粒

葡萄牙王牌C朗上場對德國，全場幾乎冇啖好食，表現勁唔掂。今場對手換上美國，可能會憑較佳個人技術搵到些少甜頭嘅，球員總入球C朗入1粒有2.6倍，可以一試。