巴西發惡大聲逐喀

猪拉多纳

兩輪未出線 傳媒狂插

世界盃A組，東道主巴西和波就可以晉級，但其實係佢哋近36年以來，首次要踢埋最後一輪，先至知能否出線，喺自己祖家發生呢種情況，實在非常尷尬，當地傳媒群起口誅筆伐，狠批領隊史高拉利嘅戰術及訓練方法，搞到「大菲」不勝其煩。今仗鬥已篤定出局兼爆內訌嘅喀麥隆，「森巴兵團」正好趁機爭取大勝一仗，確保首名出線，省靚招牌令批評者收聲。讓球主客和，巴西讓兩球，照樣直取讓球主勝。

（TVB13、now818及840周二凌晨4時直播）

巴西上仗其實創造唔少破門良機，無奈對手墨西哥門將奧祖亞表現如有神助，先後救出尼馬及堤亞高施華嘅必入頭槌，只能望門興嘆。賽後巴西傳媒自然唔會放過「大菲」，紛紛批評佢排陣、戰術，甚至連訓練方法都諸多挑剔，一時間好似人人都變成領隊，令史高拉利好冇癮，進一步激起佢要做齣好戲，證明自己嘅價值，今仗必然喪攻，力爭漂亮勝仗。
喀麥隆料雪主力出新丁

形勢上亦驅使巴西要大勝，因為佢哋僅以1粒淨得球優勢，力壓同分嘅墨西哥，若然今仗只係小勝，隨時會失去小組首名席位。堂堂「足球王國」次名出線，冇面之餘，仲要鬥B組首名，增添爭標難度，幾大都要盡數對手。

至於喀麥隆可以話一班「烏合之眾」，決賽周揭幕前因獎金問題，威脅足總罷踢，已反映佢哋毫無國家使命感。果然愈踢愈衰，上仗吞克羅地亞4蛋之餘，更發生伊高圖同莫簡祖頭撼頭內訌鬧劇，軍心已經徹底崩潰。喀麥隆足總表示會調查「狗咬狗」事件，兩人今場可能被雪藏，加上中場桑治停賽，陣容甚為不整。領隊禾卡隨時乾脆派副選吸收比賽經驗，更加抵擋唔住巴西狂攻。

至於特別項目方面，建議捧有3.85倍嘅尼馬入2球。
MARK實佢：巴西中堅 堤亞高施華

呢位巴西隊長唔只喺防線一夫當關，而且喺死球戰術發揮重要作用，憑驚人彈跳力，佔據制空權，上仗幾乎頭槌建功，屬於「森巴兵團」一大破門殺着。
MARK實佢：喀麥隆射手 韋保

32歲嘅韋保屬於喀麥隆陣中少數仲有鬥心嘅球員，佢上仗後備上陣，製造唔少威脅埋門，喀麥隆能否破蛋，就要睇呢位費倫巴治前鋒嘅演出。
A組出線條件：巴西出線

‧巴西勝或和

‧巴西負、墨西哥勝

‧巴西負、墨西哥和　(巴、克計算得失球差)

‧巴西負、墨西哥負　(巴、墨計算得球失差)

墨西哥出線

‧墨西哥勝或和

‧墨西哥負、巴西負　(巴、墨計算得球失差)
克羅地亞出線

‧克羅地亞勝

‧克羅地亞和、巴西負　(巴、克計算得失球差)
有米球證都會手緊

艾歷臣 Jonas Eriksson

國籍：瑞典

年齡：40

曾執法大賽：歐聯、歐霸盃、歐超盃，12歐國盃

簡介：艾歷臣投資有道，係千萬富豪，但佢冇打算退休，仍會繼續擔任最喜愛的球證工作。艾歷臣今屆曾執法G組首輪賽事加納對美國，場波雖然兩隊夾埋有超過20次犯規，但佢似乎稍為手緊，總共只係畀咗兩面黃牌。

執法場數：90

黃牌數：323

紅牌數：16

判12碼：16

平均黃牌數：3.59

平均紅牌數：0.18

平均判12碼次數：0.18
Mic少推介：巴西讓球勝