西班牙大盤謝幕

猪拉多纳

歡送黃金一代

另一場B組尾輪賽事，衞冕失敗嘅西班牙將於庫里蒂巴迎戰同樣出局嘅澳洲。雖然係例行公事，但「鬥牛國」悍將沙比阿朗素已確認退出國家隊，其他「黃金一代」亦有機會步佢後塵，相信隊友都想贏波歡送呢班功勳老將，不過澳洲冇晒心理包袱下，隨時同西班牙鬥攻，呢場捧大盤好過。

（TVB 13、now 818及840周二凌晨零時直播）

西班牙今屆一味搓搓搓嘅tiki taka踢法行唔通，而且眾將對勝利嘅飢渴感明顯下滑，頭兩仗全敗失七粒有辦你睇，難怪賽後沙比阿朗素公開批評隊友冇晒野心，比賽態度唔積極，佢亦心灰意冷宣布退出國家隊，相信今仗會搏盡光榮引退。除沙比阿朗素外，其他「黃金一代」如韋拿、卡斯拿斯、沙維亦有機會告別，眾將都想用一場勝利歡送呢班功勳老將，況且今屆西班牙演出咁曳，佢哋亦希望踢番場好波氹球迷，昂首離開世盃戰場，戰意唔使懷疑。
澳洲放開懷抱鬥攻

與西班牙相比，澳洲唔單止實力差幾條街，今仗仲有前鋒「老袋鼠」卡希爾停賽，主力米利根及法蘭積亦因傷倦勤，但睇番佢哋今屆頭兩場波就算處於下風，都打出永不放棄嘅精神，尤其係上仗放手一搏下，幾乎逼到荷蘭陰溝裏翻船，絕對雖敗猶榮。既然已提早出局，「袋鼠兵團」今仗更加可以放開懷抱同西班牙鬥攻，定必多士哥，轉玩入球大更佳。特別項目方面，由於韋拿可能踢埋今仗告別國家隊，預計呢位「鬥牛國」入球王會盡力爭取士哥，為自己嘅國際賽生涯畫上完美句號，先發事件不妨揀有2.05倍嘅「入球」。
袋鼠狂牛無交戰紀錄

澳洲同西班牙史上從未交手，不過「狂牛兵團」近幾屆世界盃面對亞洲球隊都能夠保持不敗。西班牙喺90年世界盃以3比1擊敗南韓，94同2002年世界盃同東道主之一嘅南韓打成平手，至於06年德國世界盃面對沙特阿拉伯則小勝1比0，睇嚟「狂牛兵團」喺世界盃對住亞洲球隊都有絕對優勢。
舒拉克拉升呢衝出亞洲

國籍：巴林　

年齡：37

曾執法大賽：2011世少盃、2012世冠盃

簡介：來自中東巴林嘅舒拉克拉從事法律相關工作，主要負責搜集資料，08年正式成為國際球證，現時多數執法亞洲級別賽事，喺亞冠盃不時見到佢嘅身影。舒拉克拉平時鍾意釣魚培養耐性，但落到場定必金睛火眼睇實場波，這次世界盃是其球證生涯首個大賽，定必把握這個「升呢」良機。

執法場數：65

黃牌數：285

紅牌數：19

判12碼：11

平均黃牌：4.38

平均紅牌數：0.29

平均判12碼次數：0.17
法達斯維推介：入球大