第四旁證睇重播解悶兼補飛

猪拉多纳

世盃期間，好多情侶一齊睇波，男士們往往遇到個難題，就係好難解釋清楚越位嘅定義畀另一半聽，結果換嚟一句：「你都唔係好識波。」各位「巴打」又唔使自卑，因為職業球證隨時都唔識分辨。前晚F組波斯尼亞前鋒迪斯高一次精彩突破入波被判越位，間接令佢哋出線希望幻滅。事實證明有必要加入電視重播畫面等措施，解決越位爭議。

現今科技發達，成天都係飛機，周街都係電腦，加入科技輔助執法好容易，例如今屆世盃有門線科技判斷入球，效果非常好，再冇上屆林柏特入波過晒白界被判唔入嘅冤枉，但越位誤判仍經常引起爭議。足球是否過白界，球員是否越位，往往係電光火石之間嘅事，球證都係人，肉眼好難睇得清楚，正因為咁更要高科技幫手。

電視台直播比賽時加入相關技術，重播畫面時以陰影做標準，可迅速顯示球員有冇越位，一目瞭然，毋須爭拗。有反對聲音認為重播會阻礙比賽節奏，但球員圍住球證來嘈，浪費嘅時間仲多啦，甚至引起衝突。反觀如果有重播幫助判斷，既準確又可減輕球證、旁證壓力，何樂而不為？

國際足協可考慮，以第四旁證擔當「觀眾」角色，睇重播後，第一時間通知球證，亦令第四旁證唔使只係負責舉牌換人同顯示補時時間咁悶。