西班牙早啲抖暑無謂獻醜

猪拉多纳

呢次真係手背又係肉，手心又係肉，因為今日同一時間開波嗰兩場B組賽事都係好吸引，分別係澳洲對西班牙及荷蘭對智利，到時都唔知揀邊場睇好。

第一輪荷蘭點樣「復仇者聯盟」大炒西班牙，同埋次輪智利點樣清脆利落擊敗「狂牛兵團」，我真係唔願意多提。總之西班牙今晚鬥埋澳洲後，就提早放暑假，我已經冇任何期望，有本事就三場分組賽你都輸晒佢，咁就可以喺世界盃留多一項歷史，不過係臭嗰種！

最火滾係佢哋一成不變嘅打法，再配合埋迪保斯基令人費解嘅用人調動，搞到好多西班牙球迷都一肚火，既激氣又傷心。不過，歷史上又唔止西班牙一隊喺上屆拎完冠軍，之後就小組出局嘅。之前意大利同法國都試過係咁，而西班牙對手澳洲又係前兩場都係輸，但口碑同觀感就好過西班牙添，至少卡希爾表現出色，不過今場呢位老將要停賽，所以可能影響到前線攻力，兩隊小組都未開齋，懷住出局心情去比賽，一定豁出去盡情踢，隨時會上演一場入球騷。
荷蘭經驗質素值得信賴

另一場小組首名爭奪戰荷蘭對智利，呢兩隊肯定入到16強，不過論大賽經驗、球員質素點都係荷蘭秤高啲，雖然「尹飛人」尹佩斯今場唔出得，但仲有洛賓同史奈達呢對孖寶，進攻應該仲有保證，智利今屆演出令人驚喜，但球隊已經殺入16強，對佢哋嚟講應該都收晒貨，對荷蘭無謂太過搏啦，今場唔使諗咁多，一樣會睇好荷蘭。