美洲隊GoGoGo！

猪拉多纳

天氣濕熱攞晒着數

唔經唔覺，今屆世界盃已經踢完咗兩輪分組賽，當然有唔少意外賽果，包括力爭衞冕嘅西班牙同港人最愛英格蘭，都係兩連敗提早執包袱；亦勢估唔到身處「死亡之組」嘅哥斯達黎加，可以先後擊敗烏拉圭同意大利，早早取得16強入場券，真係一地眼鏡碎呀！

小弟喺之前兩篇專欄都提過，今屆美洲球隊會着數啲，果然哥倫比亞、智利、墨西哥以至美國等等都有出色表現，始終歐洲強隊嚟到巴西，面對濕熱嘅氣候似乎相當難適應，睇吓前兩晚意大利對哥斯達黎加，好明顯哥斯達黎加好似有跑不完嘅氣力，明知自己技術唔夠，就採取體力化嘅踢法去制衡對手，搞到意大利就算輸緊波都谷唔起。
智利有望挫荷蘭攞B組首名

嚟到最後一輪分組賽，小弟預料美洲球隊繼續會有好表現，而喺咁頻密嘅賽程同氣候環境下，球員嘅適應力同體能將會係勝負關鍵。其中我會推介大家留意智利對荷蘭嘅榜首大戰，事關呢組嘅次名出線後好大機會同主辦國巴西正面對撼，相信冇人想一出線就要嚟場硬仗，咁贏呢場波做小組榜首就係唯一選擇！

智利今屆表現同樣令人眼前一亮，中前場球員好似阿歷斯山齊士、華加斯等都係非常靈活快速嘅球員。睇咗兩場分組賽，見到佢哋無論用波，組織上各方面配合都相當唔錯，今場對住有尹佩斯要坐波監嘅荷蘭，絕對有機會贏波攞到首名！