明晚主力反歐洲隊

猪拉多纳

歐洲球隊今年成績好差，葡萄牙昨晨於生死戰對住美國完全唔夠打，執番一分已經算好彩，不過都連累唔少捧場客損手，呢支名牌球隊真係唔叻，千萬唔好再睇得咁高。

聽晚兩組比賽，肥叔主力都係反歐洲隊，F組波斯尼亞對伊朗，波斯尼亞係踢得唔差，但個別球員唔夠級數，去到世界舞台淨係輸經驗都輸死，反觀亞洲代表伊朗愈打愈硬淨，上場對阿根廷贏盤不特止，仲要去到補時階段先畀美斯一腳世界波收死，有運的話應該有分落袋，今場繼續受讓有利，可以秤先。

E組瑞士對洪都拉斯，瑞士本身實力普通，打下風波先係捧場好時機，今次要佢哋主攻反而好棘手，讓一球、球半太多。洪都拉斯雖然冇另一支中北美洲球隊哥斯達黎加咁Sharp，不過頭兩場表現亦唔錯，第一場打少個輸畀法國冇嘢講，上次對厄瓜多爾曾經一度領先對手，唔係冇得打，今場下盤抵玩。