葡萄牙褪色味變酸

猪拉多纳

唔信陰謀論 睇好德美

美國主帥奇連士文喺對葡萄牙嘅分組賽無論戰術部署、球員狀態及鬥志，都勝過又一次喺大賽褪色嘅葡萄牙。雖然効力英超史篤城嘅閘位球員謝夫金馬倫，因正選中堅受傷而被迫客串呢個位置，事實上得「一隻腳」踢波嘅球員出任中堅經常會出現甩漏。今次就係因為謝夫甘馬倫解圍「撻Q」造就拿尼先開紀錄，搞到「奇哥」大叫「Oh No！」
丹普西入波充滿智慧

不過，葡萄牙整場機會其實唔多，最多只係得外圍遠射；而帶傷上陣嘅王牌基斯坦奴朗拿度（C朗）亦只得死球最有威脅，但美國隊甚少響禁區外犯規，令C朗嘅強項無用武之地。葡萄牙今季嘅人腳麻麻兼狀態平平，球隊欠缺獨當一面嘅球星協助C朗，可以話係今非昔比嘅「酸葡萄」。

美國其後靠鍾斯同丹普西各入一球反先2比1，當中以嚟自單親家庭、由祖母一手湊大，自細由爸爸揸車來回6個鐘送去達拉斯上足球課程嘅丹普西表現令人最深刻，呢位「美國隊長」射入反超前一球，喺冇越位嘅情況下用心口撞入網，可謂恰到好處，充分顯示足球智慧。

不過，有傷在身嘅C朗喺補時階段傳出一腳有級數嘅助攻，畀隊友扳成2比2平手，令葡萄牙保住些微出線機會，但呢一刻Peter覺得德國同美國始終係最有條件出線嘅球隊。其實睇番呢一組四隊波，德國同美國嘅水準確係高過加納及葡萄牙，Peter係唔會信陰謀論嘅，正路都係德國同美國出線機會較高。