伊朗波斯尼亞鬥數胡

猪拉多纳

新起源球場十對賽旺「大」

F組最後一輪，提早出局嘅波斯尼亞喺薩爾瓦多新起源球場迎戰一定要贏波先可以晉級嘅伊朗。波斯尼亞上仗因球證誤判輸波而出局，球員谷埋一肚火當然想攞尾彩一吐烏氣。至於伊朗近兩仗表現大獲好評，主要係球隊防守出色，但今仗要贏波先有望出線，球隊隨時因改變戰術搞到進退失據，加上新起源球場今屆舉行嘅世盃賽事都出現入球騷，今仗相信入波唔會少，捧入球大。

（TVB01、now 801及841周四凌晨零時直播）

「世盃新丁」波斯尼亞賽事舉行前被視為阿根廷出線嘅最大絆腳石，首仗1比2落敗表現其實不差，但次仗對尼日利亞卻因旁證誤判令迪斯高食「詐胡」，以及未有正視尼日利亞入球前嘅犯規而輸0比1，令波斯尼亞賽後大肆批評球證。不過，球證錯誤都係球賽嘅一部分，滿肚冤屈嘅波斯尼亞球員呢刻只能收拾心情，踢好對伊朗嘅最後一場分組賽，一吐烏氣嘅最好方法自然係入波助球隊取得世盃首場勝利，相信波斯尼亞今仗會採取更進取嘅踢法。

伊朗喺F組排第3，唯一出線希望就係要尼日利亞輸畀阿根廷，而自己喺波斯尼亞身上全取3分。根據國際足協規定，兩隊同分會依次序比較得失球差、得球數及對賽，所以伊朗盡可能要入多啲波先有望晉級16強。不過，伊朗今屆世盃賽事將大部分精力放喺防守，導致球隊攻力疲弱到依家仍然「食白果」，今仗如堅持之前嘅穩守戰術，可能因無法贏波而出局；但如果同波斯尼亞對攻隨時得不償失，但相信呢班波會盡最後努力，所以改變戰術嘅機會甚高。
迪斯高先發吼「入球」

值得一提，今仗舉行賽事嘅薩爾瓦多新起源球場，之前曾經踢過3場分組賽，分別係荷蘭5比1大勝西班牙、德國4比0大炒葡萄牙及法國5比2輕取瑞士，呢3場都係大比數賽事。加上波斯尼亞同伊朗過去5次對賽旺「大」，而且伊朗為求出線迫住放棄「泊大巴」戰術，相信新起源球場極有可能再次出現「入球騷」，今仗捧入球大。

另外，波斯尼亞前鋒迪斯高對尼日利亞慘食「詐胡」，谷埋一肚氣會更積極爭取入球，特別項目先發事件可選「入球」。
美斯謙推介：入球大