德美半場和穩陣

猪拉多纳

未必有默契 冒險更無謂

G組分組賽最後一輪兩場賽事今晚同時上演，當中自然以美國對德國一仗最受注目，基於兩軍主帥關係密切，賽前「默契和波」傳言滿天飛，黑柴相信奇連士文同勒夫唔會刻意製造賽果，不過形勢上兩軍只要唔輸就肯定出線，根本冇必要冒險，早段必然以穩為先，既然和波賠率熱到得番2.57倍，黑柴寧吼有2.1倍嘅半場和。

（TVB 13及19、now 818及840周五凌晨零時直播）

目前G組形勢明朗，美國與德國同得4分列前兩名，葡萄牙同加納只係各得1分，今仗美德只要賽和就肯定可以攜手出線，以兩位主帥嘅密切關係，想唔惹人猜測都難，不過黑柴最清楚奇連士文，呢位名帥絕對光明磊落，唔會為利益而出蠱惑，賽前佢都講明，依家唔係同勒夫敍舊嘅時候，美國永遠以贏波同第一為目標。
和都首名 德軍唔使急

黑柴信奇哥，但唔代表今場唔會和波，事實上德國實力雖然在美國之上，但勒夫嘅4-3-3新陣的確有利有弊，呢個陣式中後場可以更緊密聯繫，喺酷熱天氣下節省體力，但喺強攻密集對手時，兩閘對前線嘅支援明顯不及以往，上仗佢哋面對踢法硬朗嘅加納就吃盡苦頭，今場德軍只要唔輸就確保首名出線，勒夫當然唔同你急，先求做好防務，下半場至換「奇兵」高路斯入嚟加強攻勢，順便畀機會呢位傳奇射手創世盃入球紀錄。
奇哥識留放 唔會亂攻

奇哥雖然話以贏波為目標，但為人絕不盲目，以美國目前嘅整體實力同攻力，同德國對攻的確相當危險，唯一可以做嘅就係穩守突擊，不過球隊上仗對葡萄牙耗力甚多，加上少德國一日休息時間，加埋紮營基地同比賽場地嘅長途旅程，令美國喺體力方面蝕底咗，今仗最聰明做法都係先求不失，黑柴估計上半場兩軍都唔會急進，吼半場和好過買全場和。
德國傳奇高路斯

年屆36歲嘅「Goal老師」喺過去兩年曾經7度受傷，之前講過話能夠入選德國決賽周大名單已經心足，但上仗對加納後備入替做扳平英雄，仲平咗朗拿度決賽周入球紀錄後，高路斯已調整目標，除要協助德國奪冠外，自己最低限度要入多兩球添！