務實森巴兵擦智利私房菜

猪拉多纳

世盃16強開騷！巴西同智利今晚率先登場，合演第1場「南美洲內訌」，「森巴兵」一向都係智利「剋星」，過去10次對賽9勝1和，心理優勢贏足9條街！有消息話巴西今仗可能用費蘭甸奴擔任正選，加強組織能力，為喪攻孖寶費特同尼馬提供彈藥，智利條防線今鋪肯定有排煩，足智彩讓球巴西讓半一，捧1.76倍上盤！

（TVB13及now818台、中央5台周日凌晨0:00直播）
近10次對賽 巴西贏足9鋪

「森巴兵團」一向都係智利「剋星」，過去16次對賽，巴西喺主場出戰從未輸過畀對手，近10次相遇仲贏足9次添，即使齋計世界盃，巴西喺1998年同2010年，都曾經喺淘汰賽階段踢智利出局，睇嚟班「森巴兵」真係當正智利係私房菜咁款喎。

冇錯，巴西今屆嘅人腳的確冇以往咁星光熠熠，踢起上嚟冇晒「森巴華麗味」，不過，我正正就係鍾意佢哋夠務實！領隊史高拉利可以話係一位與時並進嘅有料教頭，佢見今屆有主場之利，就用晒班年輕當打球員做戰術核心，排出雙防中陣式，路爾斯古斯達禾同荷西保連奴鎮守中場，奧斯卡、侯克同費特，就輔助王牌尼馬爭取士哥，所以分組賽3戰已經係咁易入咗7粒，鋒力勁到得人驚。
智利鬥速度即輸 高空波弱雞

老實講，巴西成個陣入面，我最唔滿意嘅就係荷西保連奴！查實「大菲」分工夠晒清晰，但呢位熱刺防中唔知自己守定攻咁，拖慢晒比賽節奏，就連名宿薛高都嗌史高拉利唔好畀佢打正選，史帥亦「從善如流」，上仗就畀費蘭甸奴用半場時間證明自己，結果佢嘅表現堅出色好多，據講「大菲」今仗會畀呢位曼城中場做正選，「森巴兵團」嘅攻勢應該會更流暢！

智利上次擊敗巴西，已經係2000年世盃外圍賽嘅事，你可以話智利今時唔同往日，喺分組賽擊敗西班牙一戰，更加係佢哋近年代表作，不過咁，到智利上仗鬥荷蘭嗰陣，佢哋嘅弱點就表露無遺喇，一旦遇上快速、穩打穩紮嘅球隊，智利就完全組織唔到攻勢，輸第1球波，仲畀人知道埋佢哋唔識應付高空攻勢，咪忘記巴西一對中堅堤亞高施華同大衞雷斯都係頂得之人，一有死球，就足以攞智利命啦！
王牌比併：尼馬

上陣時間：256'08"

入球：4球

射門次數（中框率）：11次（91%）

助攻：0次

被成功攔截：27%

跑動距離（平均每場）：9088米

最高時速：31.07公里

傳球次數（成功%）：132（67%）
王牌比併：阿歷斯山齊士

上陣時間：288'22"

入球：1球

射門次數（中框率）：5次（60%）

助攻：1次　

被成功攔截：11%

跑動距離（平均每場）：9363米

最高時速：31.07公里

傳球次數（成功%）：136（63%）
Data King：巴西對賽9成贏波

‧近10場比賽取得9勝1和。

‧近10次對智利往績為9勝1和。

‧曾19次打入世盃決賽周，有14次起碼取得8強席位。

‧上場分組賽進攻由左邊側擊最多，佔59%。
Data King：智利鬥森巴兵旺開大

‧近10場比賽取得7勝3負。

‧近10場對巴西，有9場開入球大。

‧曾8次打入決賽周，成績最好係1962年取得季軍，其他7次16強或分組賽止步。

‧上場分組賽進攻由兩邊側擊最多，共佔80%，左右側擊各佔40%。
乜都玩錦囊：尼馬起孖7倍好分

尼馬依家同阿根廷嘅美斯，均以4球並列射手榜榜首，相信佢今場實會繼續搏命爭取「士哥」，睇番呢位巴西王牌今屆入親波都「打孖上」，佢特別項目入2球有7倍，諗得過。