荷蘭成功尹戈爾功勞大

猪拉多纳

今晚兩場16強賽事表面上勢均力敵，不過Peter認為兩支歐洲球隊荷蘭及希臘可以睇高半線。先講荷蘭對墨西哥，墨西哥今屆演出惹人好感，不過荷蘭表現亦好對辦，荷蘭之所以能夠攞到好成績，全賴老謀深算嘅尹戈爾懂得選兵之道，佢喺防線去蕪存菁，棄用老將改用新丁，令內部士氣更團結。以往荷蘭經常因為大牌球星嘅問題影響成績，今次選用年輕球員，除咗成功消除呢個問題之外，亦令球隊注入更多「X-Factor」，為球迷帶來額外驚喜，所以Peter經常強調只要有個好領隊，球隊所能發揮嘅潛力往往可以事半功倍！
希臘最大本錢係防守

另一場哥斯達黎加對希臘，哥斯達黎加能夠於死亡D組突圍令人大跌眼鏡，而且接連擊敗烏拉圭、意大利呢兩支前度冠軍，對住大眾熱門英格蘭又踢得有板有眼，令唔少球迷對呢支神經球隊充滿憧憬，不過希臘呢班波擅打下風波，防守好係佢哋最煞食地方，加上希臘球員見慣大場面，經驗比哥斯達黎加勝一籌，去到淘汰賽階段有一定優勢，今場唔排除要踢到加時、甚至互射12碼先分到勝負。