靠極速食胡荷蘭奏凱哥

猪拉多纳

洛賓 迪比雙翼齊飛

今晚16強激戰打頭陣嘅有荷蘭鬥墨西哥，「橙軍」今屆表現令人眼前一亮，呢班波速度奇高，「小飛俠」洛賓唔使多介紹，反而我認為最值得大家留意嘅，係另一隻快翼迪比！呢位燕豪芬新星分組賽2戰入2球，火速上位，有佢拍住洛賓同尹佩斯組成極速喪攻鐵三角，有力打爆慢吞吞嘅墨西哥，捧1.9倍主勝！

（TVB13及now818台、中央5台周一凌晨0:00直播）

現代足球講求效率同速度，話之你幾好腳法，只要一兩個高速反擊，就可以置你於死地！講到「防反」戰術，荷蘭肯定係表表者！「橙軍」喺鬥西班牙一仗，就係憑極速突擊，隊咗「鬥牛軍」5粒，計計埋埋，荷蘭已經喺分組賽3戰全勝喪入10球，鋒力勁到得人驚，即使齋計佢哋依家嘅氣勢，都夠力殺敗任何一支勁旅！
韋拿杜姆料出任正選

最重要嘅，係荷蘭領隊尹戈爾堅有料，佢每場波都會試用唔同球員，尋日大軍操練，尹帥就將中場韋拿杜姆同通天老倌古積特，擺落正選大軍度操，有傳媒仲話，韋拿杜姆會代替約拿芬迪根斯文擔正添，不過點都好，尹戈爾今季最成功嘅「作品」，一定係快翼迪比！呢位20歲小將對澳洲嗰陣一戰成名，第3仗鬥智利，佢到比賽末段竟然仲有力爆上去埋齋，有佢同洛賓雙翼齊飛，配合復出嘅尹佩斯，點會冇波入呀？
墨西哥一對防中換人

係，荷蘭今仗有守將馬田斯恩迪上仗對澳洲「中招」，今晚未必落場，中場利萊費亞亦喺操練中拉傷多數倦勤，但墨西哥呢邊仲大劑，一對防中荷西華斯基斯同埋名將沙斯度，分別因坐波監同受傷，今戰只能夠做啦啦隊，成條第一道屏障換晒人，點踢先？

再講，墨西哥班人太重「美洲味」，個個都要上腳，搞一大輪先入到人哋禁區，對付喀麥隆同克羅地亞就話得啫，遇着喪跑超快嘅荷蘭，中場畀人逼兩逼就甩拖啦！西班牙有辦你睇，慢慢搓玩腳法，最終只有死路一條，除非墨西哥班人突然升呢勁過「鬥牛兵」啦，否則想唔輸都難咯！
Data King：近3次16強戰皆開半細

‧荷蘭近10場取得6勝3和1負。

‧90年後4次對住墨西哥，取得3勝1和。

‧3場分組賽總傳球次數為1,238次，為32強之中排尾5。

‧近3次打入世盃16強（1998、2006及2010年），3場皆開半場細。
Data King：近5屆皆16強止步

‧墨西哥近10場取得5勝3和2負。

‧90年後4次對住荷蘭，均上演入球騷。

‧3場分組賽平均成功解圍率為75%，32強之中排尾5。

‧連續5屆16強止步，當中開出3次全場大。
乜都玩錦囊：兩隊穩陣行先吼半和

墨西哥對住火力強勁嘅荷蘭，肯定會屯重兵喺後防，同派專人凍結尹佩斯同洛賓。咁啱兩隊喺頭3輪分組賽，半場都係同對手打和0:0或1:1，反映兩隊都以穩陣行先，唔會輕舉妄動，「半場和」有2倍值得一博。