法軍蓄銳 捉超霸鷹

猪拉多纳

半力和厄瓜多爾留一手

今晚世盃16強上演兩場非、歐對決！今屆係歷來首次有兩支非洲球隊殺入16強，不過亦係歷來鬧出最多獎金風波嘅一次，其中一支主角尼日利亞今晚將於巴西利亞市國家球場同法國爭入8強。法國上場打和厄瓜多爾明顯留有一手，今次精銳盡出，面對內部士氣、團結性皆有問題嘅「超霸鷹」力足贏波晉級，法國讓一球坐走望贏，上盤博得過。

（TVB13及19、now 818及840周二凌晨零時直播）

今屆能夠有尼日利亞、阿爾及利亞兩支非洲隊打入16強，對非洲國家及球迷嚟講本應好值得高興，可惜多支非洲隊卻先後因為獎金問題而鬧出意圖罷踢風波，令佳績蒙上污點。今屆參賽5支非洲球隊，喀麥隆、加納及尼日利亞都先後因錢而同足總吵大鑊，尼日利亞算叫做有啲良心，起碼攞到出線資格後先同足總講數，唔似喀麥隆、加納連本分都未做好咁無恥。
尼日利亞冇隊形紀律差

據日前消息報道，尼日利亞足總已經同球員傾掂數，將會如期放發球隊出線應得嘅獎金，暫時嚟睇唔會影響今場比賽，但從一連串事件睇到，部分非洲球員落場都係睇錢分上，一日獎金未到手，有冇決心爭取晉級真係好大疑問。

尼日利亞於F組三戰得4分，表現唔算突出，如果唔係次輪對波斯尼亞受益於球證誤判，能否出線都成問題，佢哋基本上同好多非洲球隊有同一弊病，就係部分球員有質素，但踢落各自為戰，完全冇隊形可言，拍埋紀律性較強嘅歐洲隊自然差一截。

法國今屆嗰頭開得靚，頭兩輪先後大勝洪都拉斯3比0及瑞士5比2，令球員愈踢愈有信心。上場對厄瓜多爾因為受傷停問題影響，領隊迪甘斯收起咗迪保治、艾拉、華布拿等主力。隨着中場卡比耶坐完一場波監可以復出，早前患上腸胃炎嘅中堅華拉尼已經康復並於上仗後備入替，法國可以出盡法寶撲擊對手。波童相信法國可於法定時間之內贏波，讓一球揀上盤坐走望贏。
相遇一次尼軍小勝

法國同尼日利亞只曾對賽過一次，當時係09年嘅一場熱身賽，尼日利亞憑住阿克柏拉一箭定江山，作客小勝1比0。至於法國喺過去三屆決賽周中，面對唔同嘅非洲球隊共錄得1勝2負成績，似乎對住非洲球隊無咩優勢可言。相反尼日利亞喺世界盃對歐洲球隊嘅成績不俗，累積5勝1和2負足以證明佢哋對付歐洲隊伍得心應手，其中喺今屆分組賽就曾以1球小勝波斯尼亞，係尼軍繼98年之後再次喺決賽周擊敗歐洲球隊，有往績支持，尼日利亞面對住法國呢隊歐洲兵似乎更加有勝算。
數學老師尺度頗鬆

基格拿Mark Geiger

國籍：美國　年齡：39

曾執法大賽：11世青盃、12奧運、13世冠盃

簡介：基格拿正職係中學數學老師，09年仲攞數學同科學教學大獎，至於其球證生涯主要在美職執法，亦會喺中北美洲大賽出現，做過2012年奧運足球裁判，佢喺奧運並不經常派牌，執法尺度頗鬆。基格拿喺今屆世盃吹過兩場波，包括哥倫比亞對希臘同西班牙對智利，兩場都係歐洲波對南美波，加埋派咗6張黃牌，表現正常。基格拿今場將會執法非洲球隊尼日利亞嘅比賽，今屆非洲球隊出現好多異常情況，「超霸鷹」喺分組賽贏波斯尼亞1比0，更係球證誤判下嘅受益者，睇吓精於數學嘅基格拿遇到呢支非洲兵又會點處理。
今屆派黃紅牌：

黃：6　　

紅：0

執法場數：41

黃牌數：154

紅牌數：12

判12碼：10

平均黃牌：3.76

平均紅牌數：0.29

平均判12碼次數：0.24
笛子波童推介：法國 上盤