初段少角球等等至出手

猪拉多纳

南美足球壇近30年都係畀巴西同阿根廷玩晒，但隨着烏拉圭喺南非世界盃攞第四，到呢屆再有哥倫比亞異軍突起，南美足球發展帶來好多啟示，單靠巨星單天保至尊唔實際，而且要一早部署戰略令晉級路容易行。

哥倫比亞技術性擊倒烏拉圭值得表揚，呢隊波闊別世界盃16年，今屆因外圍賽戰績優異，加上近年世界排名不斷上升，喺決賽周分組抽籤前被列為種子隊，同組無乜強手下成功過關斬將，領隊柏加文居功至偉，佢提早喺外圍賽發力為決賽周鋪路，值得其他南美洲球隊參考。
仲有好嘢留番砌巴西

哥倫比亞喺上世紀90年代曾經威過，仲記得有「金毛獅王」華達拉瑪、「狂人」門將希基達 同埋射手艾斯派拿呢啲名將，今屆焦點一直係「老虎」法卡奧，當佢受傷踢唔到以為世界末日，原來隊波唔使圍繞住佢嚟踢仲好，更加能夠將整體戰術發揮到極致，正如我做現場直播所講，其實呢隊波仲有好多堅料收收埋埋未放出嚟，留番8強賽畀巴西慢慢歎！

作為東道主嘅巴西，雖然射12碼淘汰智利，但冇王者霸氣，即使對哥倫比亞嘅交鋒紀錄佔晒上風，以現時兩隊嘅狀態計，巴西要付出好大代價先至有機會殺入四強。