尼日利亞體能好唔守法

猪拉多纳

前晚世界盃首場16強賽事，度士好欣賞嘅智利可以逼到同巴西互射12碼，呢班波冇咩球星，但勝在拚勁十足，雖然佢哋未能晉級，但值得鼓掌。至於哥倫比亞再次帶來驚喜，顯示南美波已非由巴西同阿根廷獨大。球壇正係需要智利及哥倫比亞呢類異軍，帶來新衝擊。
森巴想闖關要改善埋門

智利整體表現唔錯，創造唔少機會，互射12碼落敗無話可說，畢竟巴西有主場之利，場內氣氛唔多唔少影響雙方球員射門信心，「森巴兵團」呢方面的確佔優。智利出局但贏得尊重，證明踢波非靠名氣，體力、鬥志亦好重要，智利透過今屆比賽傳遞出呢個重要訊息。

巴西晉級有助保持賽事號召力，但球隊要盡快改善埋門把握力，否則下關未必咁好彩。佢哋8強對手哥倫比亞三線實力比智利更強，16強輕取烏拉圭充滿說服力，預料呢場8強大戰會更激烈。

至於今晚兩場16強比賽，尼日利亞體能好，呢個優勢好緊要，畢竟睇得太多歐洲隊球員踢到抽筋，所以法國未必佔到甜頭，讓唔起尼日利亞。另一場德國經驗、人腳質素遠勝阿爾及利亞，有力大勝。