撐德國大有斬獲

猪拉多纳

南下清涼綠洲 捕獵沙漠之狐

爽！爽！爽！世盃16強德國鬥阿爾及利亞，爭盃熱門德國喺東北非捱完3場酷熱分組賽後，飛到南部涼浸浸嘅阿萊格里港，簡直好似喺沙漠見到綠洲，成班球員當堂爽晒，今晚面對後防欠穩嘅阿爾及利亞，相信係時候演入球騷，睇番德軍喺世盃史上所有16強淘汰賽錄得全勝佳績，近兩屆更愈贏愈易，今晚炒得起經驗級數都差得遠「非洲之狐」，雙選入球大同讓球主勝。

（TVB 13及19、now 818及840周二凌晨4時直播）
河岸球場旺入球騷

德國於G組分組賽順利以首名出線，佢哋分組賽頭3場喺巴西東北部嘅薩爾瓦多、福塔雷薩同累西腓上演，比賽時氣溫介乎26至30℃之間，酷熱天氣對德國球員嚟講無疑係一大負擔，球員顧忌體能過分消耗難免冇去得咁盡，當中踢得最差嗰場係30℃高溫下賽和加納，但今晚去到預測氣溫喺9至16℃之間嘅阿萊格里港，自然輕鬆好多。事實上呢個河岸球場喺今屆已經進行過4場分組賽，場場都開入球騷，除咗攻力奇弱嘅洪都拉斯外，其餘7隊最少嗰隊都入兩球，連德國今場對手阿爾及利亞都試過對南韓入4粒，德軍今仗入波又點會少？何況今仗亦係呢個球場今屆世盃嘅告別戰，蘇州過後冇艇搭了！

除咗涼快天氣之助，德國係近年世界大賽表現最穩定嘅球隊，未必攞到冠軍，但絕難被爆冷，近8屆賽事最差嗰兩次都打入8強，其餘6屆1冠3亞2季，唔係頂級勁旅都贏佢哋唔到，準得交關。自86年世界盃開始設16強淘汰賽起，德軍連續7屆16強賽事全勝，近兩屆更分別輕取瑞典同英格蘭，阿爾及利亞根本未夠料做攔路虎。德國於分組賽最後一場小勝美國，但全場控制戰局，復出嘅舒韋恩史迪加對中場攻守串連幫助極大，領隊勒夫賽後對前線積極性同把握能力都詐晒形，認為球隊應該入多幾球，相信眾將今晚會加多幾錢肉緊，爭取一場大捷。
阿軍守齋隨時腳軟　

阿爾及利亞今次歷史性首度殺入世盃16強，對該國已經係一大成就，佢哋分組賽只贏過今屆最令人失望球隊南韓，最終只靠得失球差壓倒攻力疲弱嘅俄羅斯勉強出線，好難再有更大奢望。何況3場分組賽場場有失，合共失5球，防線不擅死守，面對攻守平衡嘅德軍凶多吉少。再者佢哋講明堅守穆斯林齋戒規條，球員喺日出後水都冇滴落肚，體能點都差啲，今晚遇強敵踢到末段，隨時散晒。
歷來兩次對碰德軍輸晒

德國只曾喺前西德時期同阿爾及利亞交手過兩次，而且都係輸波而回。兩軍喺世界盃歷史上唯一一次對碰係喺1982年西班牙決賽周，當時阿爾及利亞以2比1贏波。不過雙方已經32年冇對賽過，呢啲往績未必可靠。睇番阿爾及利亞以往喺世界盃對住歐洲球隊，共錄得1勝3和4負嘅劣績，包括今屆喺分組賽對住比利時同俄羅斯都未能夠勝出，可見佢哋並唔擅長應付歐洲嘅隊伍。反觀德國喺往屆世界盃「食住」非洲隊，7次對碰中贏咗4場，但唯一一次輸波嗰場嘅對手正正就係阿爾及利亞。

雷斯第2次吹「德非」大戰

國籍：巴西　　　　　

年齡：39

曾執法大賽：13世青盃、13世冠盃

簡介：雷斯係巴西名哨，正職係政府公務員，精通葡語、英語、西班牙語及意大利語，去年更於世冠盃決賽執法，表現唔錯，不過佢試過3年一場賽事向同一球員兩度出示黃牌，但就冇畀紅牌，成為笑柄。今屆世盃雷斯吹過兩場賽事，包括法國3比0勝洪都拉斯同德國2比2和加納，其中法國對洪都拉斯一仗共出示7黃1紅，但德國對加納僅出示1面黃牌，共通點係兩場都開入球大。今場係雷斯本屆第2次執法德國賽事，巧合地德國兩場都係對非洲球隊，上次德國和波收場，今場德國對住非洲兵阿爾及利亞，又會否出現另一結局？

執法場數：40

黃牌數：180

平均黃牌：4.5

紅牌數：18

平均紅牌數：0.45

判12碼：12

平均判12碼次數：0.3
今屆派牌：

黃：8

紅：1
德國

主要後備：6基迪拉(中場)、10普多斯基(中場)、9舒賀爾尼(中場)、11高路斯(前鋒)

入球球員分布：湯馬士梅拿(4球)、曉姆斯、馬里奧葛斯、高路斯(1球)

入球時間分布：0-15分鐘(1球)、16-30分鐘(0球)、31-45分鐘(2球)、46-60分鐘(2球)、61-75分鐘(1球)、76-90分鐘(1球)

黃牌在身：賀維迪斯
阿爾及利亞

主要後備：2保基拉(後衞)、19施列迪泰達(中場)、7耶巴達(中場)、15蘇丹尼(前鋒)

入球球員分布：施利文尼(2球)、菲侯利、夏利治、迪查保、巴謙美(1球)

入球時間分布：0-15分鐘(0球)、16-30分鐘(3球)、31-45分鐘(1球)、46-60分鐘(1球)、61-75分鐘(1球)、76-90分鐘(0球)

黃牌在身：賓達納、保基拉、美斯巴、拿比爾基拿斯、卡達梅路
蘇斯黑柴推介：大/德國讓球勝