法蘭西精兵 圍捕貪錢超霸鷹

猪拉多纳

世盃16強激戰嚟到第3日，法國今晚會同尼日利亞爭奪8強席位。早喺第2輪分組賽嗰陣，我已經講過，法國係列強中最有霸氣嗰隊波，果然，「高盧雞」首2戰喪入8球，第3場波仲收起半隊主力搏今鋪添，無論體力、鬥志同技術都贏晒賽前又爆罷操風波嘅尼日利亞，法國讓球盤讓一球，可以話坐走望贏，捧1.87倍上盤啦！

（TVB13及now818台、中央5台周二凌晨0:00直播）
又嫌獎金少！尼日利亞罷操兩日

先旨聲明，我絕對唔係種族歧視主義者，只不過今屆世盃啲非洲球隊真係寧舍麻煩，繼喀麥隆同加納後，尼日利亞又同足總因財失義，搞到幾乎罷踢，呢兩日佢哋亦因為咁而冇練波添！

呢單嘢都幾搞笑，話說喺第1場分組賽和伊朗後，「超霸鷹」每人袋咗5,000鎊獎金，好喇，到佢哋第2場贏波斯尼亞，有成1萬鎊落袋，贏場波有12萬幾港紙，算係咁啦，吖，點不知呢班腰纏萬貫嘅球星都仲唔滿意，一度搞到罷操2日，要足總即時Send筆Cash過嚟巴西先拆得掂！
法國上仗留力搏今鋪

我作為一隊波嘅副總監，又做過球員，當然知道班人諗乜，無理想、無民族榮譽感，踢波純粹為錢，落到場又點會有Heart呢？

再講，即使尼日利亞收到錢後的起心肝「做嘢」，都肯定唔夠法國砌啦！事關「高盧雞」分組賽盡顯霸氣，首兩戰分別炒起洪都拉斯同瑞士，第3仗仲收起大半隊主力，迪保治、華拉尼、艾拉、華布拿同基奧特等都坐喺後備席，養精蓄銳搏今鋪，悍將卡比耶又刑滿復出，即使比賽場地國家球場草地情況欠佳，國際足協尋日通知法國冇得喺球場練波，守將馬馬度沙高又因肌肉受傷冇操到，今場多數缺陣，都一樣冇有怕！

仲有一點，今屆世盃有一個現象，就係入到16強嘅歐洲球隊當中，3戰全勝嘅荷蘭、比利時，以及霸氣盡現嘅法國，其實都係有好多非洲裔球員，所以較易適應巴西嘅炎熱天氣，另外嗰3隊瑞士、希臘同德國，表現就相對失色，英格蘭、意大利同西班牙呢啲就更加唔使講啦！正因為咁，法國眾將去到巴西，表現唔單止冇走樣，保羅普巴、賓施馬等人，直情仲弗過喺球會嗰陣添，唯一隱憂都冇埋，我諗唔到有咩理由唔撐法國囉！
防中比併：約翰米基爾

効力球會 車路士（英超）

上陣時間 288'22"

入球 0球

射門次數（中框率） 3次（67%）

助攻 1次

被攔截（成功率） 8次（38%）

跑動距離（平均每場） 9,953米

最高時速 26.68公里

傳球次數（成功%） 210（73%）
防中比併：保羅普巴

効力球會 祖雲達斯（意甲）

上陣時間 256'08"

入球 0球

射門次數（中框率） 7次（57%）

助攻 1次

被攔截（成功率） 0次（0%）

跑動距離（平均每場） 7,173米

最高時速 28.69公里

傳球次數（成功%） 144（83%）
Data King：法國近8次半場不敗

‧法國近10場比賽取得7勝2和1負。

‧同尼日利亞對賽過1次，當時法國以0:1倒灶輸波。

‧近8場比賽入面，半場賽果為6勝2和。

‧攔截數目只有31次，32強之中排尾二。
Data King：尼日利亞撲救次數列第2

‧尼日利亞近10戰只得2勝6和2負。

‧3場分組賽撲救次數為17次，32強中第2多。

‧3場分組賽攔截次數為62次，成功次數為42次。

‧近3次對歐洲球隊成績為1勝2和。
Data King：博法國大炒超霸鷹

法國上仗半力出擊兼Hea到爆，但依然能摸和厄瓜多爾，實力深不可測，今場對住同足總因財失義嘅尼日利亞，有機會再大炒一場，上盤、「讓球主勝」兼投之餘，不妨玩埋1.95倍嘅入球大。