見招拆招:（精叻仔）京城天寶先拔頭籌

不死鸟

 剛戰跑完八場賽事之後，馬會決定腰斬第九、十場賽事，到底係因為跑道情況變差定係騎師陣上視野模糊﹖無論答案誰屬，馬會做得呢個決定總有佢嘅原因。

        不過，站響馬迷立場去睇呢件事，馬會響雨勢最大之時唔宣布腰斬，反而響雨勢稍為減弱之時才決定腰斬，無疑令說服力大減。而筆者離開馬場之時，更不停聽到有馬迷埋怨馬會，指馬會響差不多停雨先至腰斬賽事，令佢哋想收復失地都唔得。

        然而，筆者認為馬會今次其實都冇做錯，馬迷畀錢入場睇跑馬，睇少兩場賽事確係有所損失，但其實腰斬賽事，損失最大嘅肯定係馬會，既然連馬會都決定壯士斷臂，證明跑道情況可能比肉眼睇見嘅更差都未定，為咗人馬安全，腰斬賽事無可厚非。

         聽晚天文台預測仍會有微雨，估計賽事會繼續響變化地上舉行，一於再貼游水馬。頭場五班千八米，「京城天寶」在港唯一頭馬就係響軟地取得，證明變化地性能一流，上仗輸條頸畀「年年如意」得第二，足見狀態已經返咗嚟，今次縮程跑千八米可先拔頭籌。

        第六場三班一哩，「勝利雄威」近期健康已回穩，上仗響同程僅以頸位輸畀「玩具神話」得第三，已交出上佳水準，今仗抽到一檔必把握機會贏番一仗。