實力戰術差唔多 法德對決吼半和

猪拉多纳

話咁快世盃嚟到8強階段，歐洲同美洲球隊各佔4個席位！睇番16強嗰陣已經鬥得難分難解，好多場波都要踢到加時、甚至12碼先分到勝負，嚟到8強，一定會更激！今晚法國鬥德國，法國男士出名溫柔又浪漫，德國男人靚仔又白淨，呢場火併唔係你死就我亡，既然兩軍實力同戰術都係差唔多，就博半場分唔出高下，吼個1.98倍半場和啦！

（翡翠台、明珠台、TVB13、now818台及中央5台周六凌晨0:00直播）
德國7將患流感 未知邊個落場

德國16強對阿爾及利亞，要鍊到加時階段先分到勝負，成隊波嘅表現同之前分組賽差好遠，唔係門將紐亞醒打得好，輸咗啦！紐亞全場總共有19次走出禁區同15次攔截，賽後仲畀外界大讚佢係繼碧根鮑華，同馬圖斯之後嘅最佳清道伕添，咁就死啦，即係話條防線唔掂囉！對於外界批評夾硬將司職右閘嘅拿姆擺喺中場，領隊勒夫賽前向《時代報》繼續死撐，強調即使梅斯達菲因傷緣盡世盃，拿姆都會繼續踢中場。

其實勒夫今仗都幾大壓力，雖然中堅曉姆斯病愈，可聯同傷愈嘅鋒將普多斯基齊齊復出，但呢位「型佬」尋日就表示，大軍有7位球員有流感症狀，未到最後一刻都唔知會派邊個落場。點都好，德國16強鬥阿爾及利亞一戰，後防錯漏百出，勒夫肯定會下令班守將打醒十二分精神，咪要紐亞再下下衝出嚟補鑊。
法國守強攻弱 換邊後先發力

「高盧雞」上場憑「小矮男」華布拿喺比賽尾聲炮製兩個「士哥」，以2:0揮低尼日利亞，晉級8強。睇番歷屆紀錄，原來法國每逢世界盃贏非洲球隊，都一定會入決賽，又贏波又攞彩！之不過成場波法國雖然有好多攻勢，但把握力認真麻麻，射極都唔入，又往往換咗邊先發力，好彩呢班波防守力超好，迄今只係失咗2粒，係暫時嘅世盃防守王，都總算靠得住嘅。

計表現同實力，法、德本來就旗鼓相當，90分鐘打和機會極高，咁上半場雙方都唔敢亂嚟，打和又有乜咁出奇？捧半場和就最好不過啦！
指揮官比併：馬里奧葛斯

場數：4

効力球會：拜仁（德甲）

上陣時間：219分鐘

入球：1

平均射門：1.75

平均攔截次數：1

傳球成功次數（成功率）：96（84.4%）

最高跑動時速：27.9公里

平均跑動：7.325公里
指揮官比併：華布拿

場數：３

効力球會：馬賽（法甲）

上陣時間：250分鐘

入球：1

平均射門：2

平均攔截次數：1.67

傳球成功次數（成功率）：134（72.8%）

最高跑動時速：29.4公里

平均跑動：7.275公里
Data King：法國對賽五五波

‧法國近10場比賽取得7勝2和1負。

‧近10次對德國，有8場開咗半場細同入球單。

‧近3次打入決賽周8強，3場都係開半場細。

‧對過德國25次，取得11勝6和8負。
Data King：德國入8強旺半細

‧近10戰取得5勝5和不敗成績。

‧近8戰有7場開半場細。

‧近3次打入8強（2006年、1998年、1986年）都開全場細。

‧25次鬥法國，德國合共攻入42球。
乜都玩錦囊：高「守」過招博細

法國條防線表現出色，至今只係失咗2球波，但過去兩戰嘅攻勢突然死晒火，要到比賽末段先入到波，對面德國嘅情況都係一樣，近2戰法定時間內加埋只入得1粒，今仗高「守」過招，博1.62倍細啱數。