勞基摩亞坐波監多倫多冇槍做細界

猪拉多纳

美國國家隊喺世盃16強對比利時奮戰而敗，贏得全世界嘅尊重，阿King都要畀個「Like」佢哋呀！聽朝睇完世盃8強荷蘭對哥斯達黎加，未攰嘅球迷可以直落睇埋美職ＦＣ多倫多主場對華盛頓聯隊，由於雙方都有主力前鋒停賽，攻力受削，阿King今場捧入球細！

（TVB 301周日早上7時直播）

ＦＣ多倫多周中先同芝加哥火燄踢完，多倫多前鋒勞基摩亞做埋「紅牌阿姑」，今場對住華盛頓聯隊不單止體力輸蝕，仲要冇埋勞基摩亞，認真大鑊。為美國出戰世盃嘅中場主力米高巴特利亦冇咁快可以出戰，所以ＦＣ多倫多今場真係冇本錢攻得入華盛頓聯隊。不過華盛頓聯隊亦唔好得幾多，今場有隊中神射手艾斯賓杜拿停賽，呢位29歲阿根廷前鋒至今喺美職入咗7球，球隊冇咗佢攻力大幅削弱，細盤值得捧場。
衝擊作客腳軟捧芝華士

阿King再講埋另外兩場美職，溫哥華白帽主場迎戰西雅圖海灣者，海灣者今場有多名主力缺陣，中場奧斯禾度阿朗素同干沙路派尼達要坐波監，前鋒丹普西及後衞耶迪連就啱啱先幫完美國出戰世界盃，今場唔會上陣。對手溫哥華白帽並非泛泛之輩，海灣者今場作客為穩陣起見或會以守為先，一於再追細！至於美國芝華士主場對蒙特利爾衝擊一仗，衝擊作客例牌腳軟，開季至今作客未嘗一勝，芝華士主勝不妨一試。