11個紅魔圍攻1個美斯 阿根廷形勢不利

猪拉多纳

為咗睇波可以去到幾盡？由世盃揭幕戰至到依家8強，成日捱通宵，又邊歎消夜邊睇波，唔單止多咗好多青春痘，條腰仲多咗幾磅肉添！不過就算冇咗個靚樣都好，今晚點都唔可以錯過最後兩場8強大戰嘅，頭場就有阿根廷鬥比利時喇！歌仔都有得唱啦，「一支竹仔會易折彎」，阿根廷淨係靠美斯一個擔大旗，對住奇兵比利時想贏唔易，讓平半都嫌多，博2.12倍下盤！

（無線翡翠台、明珠台、TVB13及now818台、中央5台周日凌晨0:00直播）
4場MVP都係美斯

阿根廷同比利時喺16強分別都要同瑞士、美國踢到加時先分到勝負，冇計啦！阿根廷成隊波淨係靠美斯一個，點搞呀？佢哋喺今屆決賽周總共入咗7球，當中有4個「士哥」係由美斯包辦嘅，最慘係3場分組賽同上場16強大戰，4場比賽嘅最佳球員都係美斯，係就係破晒世盃紀錄，但咁樣並唔係好事囉！

美斯班阿根廷隊友好似拿維斯同希古恩咁，場場都隱晒形，上場迪馬利亞入波好醒咩？佢入波前咪一樣咁廢，入嗰球如果唔係美斯一個扭幾個，送到佢面前就晒位，「天使」都未必入得到波啦！咁搞法，比利時班中後場球員只要睇實美斯，已經可以搞掂晒全隊阿根廷！一旦美斯惡唔出樣，阿根廷想靠班隱形俠贏波？堅窄囉！
比利時完成目標冇壓力

比利時時隔28年後再次殺入8強，已經完成今屆世盃目標，所以班球員嘅壓力應該唔會太大。睇番上仗「紅魔」對美國嘅賽後報道，話比利時每3個攻勢就製造到1個射門，如果唔係侯活都唔會破到一場波撲救16次嘅紀錄啦！只要比利時踢得番呢種侵略性足球，我就堅戥阿根廷班後防擔心喇。我睇好比利時可以喺法定時間內保持不敗，穩陣啲嘅博比利時受讓下盤，夠狠嘅直取3.05倍和波，甚至撐埋比利時2.55倍晉級都仲得！
Data King：阿根廷4戰未贏過盤

‧阿根廷近10場比賽取得6勝3和1負。

‧今屆4場世盃比賽，讓球盤全部輸晒。

‧近5次打入決賽周8強（分別係2010年、2006年、1998、1990年以及1986年），有4場開半場和。

‧近8場比賽開咗7次半場細。
Data King：比利時近10戰僅2敗

‧比利時近10戰6勝2和2負。

‧近8場比賽開咗7次半場細。

‧曾對阿根廷3次，比利時取得1勝2負，當中兩軍合共入5球，平均每場入1.67球。
乜都玩錦囊：硬鬥硬玩大佢

阿根廷同比利時今屆世盃雖然入波唔多，但其實都係因為對手縮後唔攻所致，今晚兩軍硬碰硬，攻起上嚟入波一定唔會少，一於博2.2倍「入球大」。