決賽等睇 德國鬥阿根廷

猪拉多纳

巴西荷蘭見晒底

為期一個月嘅世界盃，踢踢吓踢埋呢個禮拜就完咯，各位打工仔捱多幾日就可以過番「正常生活」，小弟亦都可以歇一歇。不過又真係有啲唔捨得嘅，惟有寄望剩低呢4場波好戲連場啦！小弟本來好想睇到巴西同南美世仇阿根廷喺世盃決賽歷史對碰，不過依家咁環境，相信決賽多數係德國對阿根廷嘅「歐美大戰」，今晚東道主巴西喺4強鬥德國，相信亦係呢隊主辦國出局之日。

講真對今屆巴西國家隊，其實都幾失望吓，因為完全唔見昔日「森巴兵團」嘅華麗風格，只係由尼馬一個孭起晒全國希望，實在太過分喇！家陣尼馬受傷退出雖然好可惜，但係隊波無咗佢同中堅堤亞高施華，亦都畀巴西有晒藉口，就算呢場輸波出局，又或者攞唔到冠軍，誇啲講都唔驚國民暴動啦！
德國夠平均巴西有藉口輸波

相反，睇番德國隊，人哋雖然賽前已經無咗主力馬高列奧斯，但其他球員有實力、有「膊頭」、有能力之餘，一落到場就自動波去填補列奧斯嘅空缺，唔同巴西班友仔淨係識推個波畀尼馬。德國實力咁平均，今晚要砌低殘陣嘅巴西出線有幾難先？

至於聽晚另一4強大戰荷蘭對阿根廷，小弟就睇好冇乜冠軍相、但踢落都算穩打穩紮嘅阿根廷喇。講起阿根廷，大家可能會話：「咪又係踢美斯一個？」睇真啲又唔係喎，阿根廷到目前為止踢咗5場，有3場都零失球，咁就證明馬斯真蘭奴同加雷領導嘅中後場防線夠硬淨。後防守得住，喺前面嘅美斯只需要一次機會，就已經可以造就隊友入波或自己搞掂啦！呢樣嘢喺阿根廷晉級嘅過程有辦你睇！
阿根廷守得穩荷蘭「墨哥」都搞唔掂

相反荷蘭同法國一樣有頭威冇尾陣，分組賽冇遇過啲乜嘢考驗，但喺16強同8強分別對住墨西哥同哥斯達黎加，已經足以將「橙衫軍」逼埋牆角，荷蘭今次4強呢關真係難過o架！所以各位球迷，都係坐定定等睇阿根廷決賽鬥德國啦！