漏斗防線 撞正美斯 尹戈爾仲有奇招？

猪拉多纳

睇埋今晚就知決賽另一席位花落誰家，究竟係荷蘭定阿根廷呢？呢場係兩個左腳王洛賓同美斯嘅對決，洛賓係勁、鬥心又強，但遇着馬斯真蘭奴咁硬淨嘅防守唔係話過就過！呢邊美斯一樣咁弗，到底尹戈爾又有乜嘢奇招去防範呢位球王呢？識睇今晚梗係睇呢啲啦！

荷蘭8強互射12碼驚險淘汰哥斯達黎加，尹戈爾一招換龍門博贏咗，但佢講明施利臣今場繼續擔正，最令人擔心係條漏斗後防，史奈達加韋拿杜姆嘅中場組織力弱，尹佩斯失機頻頻狀態曳，成隊得洛賓最對辦，雖然我唔多鍾意佢太獨食，不過上場見佢咁搏命又有鬥心，到加時依然不惜力氣去逼搶對手，值得一讚，希望佢今場都有貨交啦！傳聞話有傷嘅尼祖迪莊同利萊費亞已經復操，對橙衣兵團嚟講絕對係好消息。
獨立日198周年 阿根廷4強戰未衰過

阿根廷自1990年後再闖4強，當地傳媒計過數，佢哋係相隔8,771日再殺入世盃準決賽，咁啱今日7月9號係阿根廷獨立日198周年，點可以喺呢個重要日子失威呀？美斯有幾犀利就唔使多講，今屆決賽周佢製造咗19個入波機會係眾球員之最。正如領隊沙貝拉話齋，美斯係沙漠中嘅水源，當大家身陷險境，佢就會挺身而出，成隊都靠晒佢！

迪馬利亞因傷缺陣，慶幸阿古路及時復出，希古恩亦重拾射門鞋，砌埋拿維斯落去火力夠晒猛！再加上阿根廷過往4次入到4強全部都可以順利入到決賽，睇嚟呢個輝煌戰績可望延續嘞！