巴荷冇心搏Hea踢玩半細

猪拉多纳

巴西喺4強畀德國打到體無完膚，球迷都睇到喊晒口，賽後巴西多份報章都以全黑色做版頭，對於「足球王國」嚟講，根本就同打敗仗無分別，季軍戰仲點會有心機搏命。對手荷蘭情況差無幾，估計呢場波雙方都冇乜Mood踢，博個1.54倍半場細啦！

（TVB13及now818台、中央5台周日凌晨4:00直播）
尹戈爾︰季軍戰冇意思要廢除

比賽從來勝者為王，敗者為寇，入唔到決賽嘅打擊真係好大，就連出名多奇招嘅荷蘭領隊尹戈爾，都話諗唔到用咩方法去激勵班兵踢季軍戰，仲大呻呢場波無意思：「我15年前都講過，世盃唔應該設有季軍戰。」尹帥仲話，荷蘭輸波收場嘅話，即係連輸兩場以失敗者姿態返國，就算之前踢得幾好都唔會有人記得。咁講法，排陣素來保守嘅尹戈爾，為咗唔想兩連敗，呢場唔會突然進取囉！
巴西跌谷底 球迷唔撐大菲等炒

東道主巴西上仗輸完畀德國七個一皮後，代隊長大衞雷斯嘅喊樣，唔多唔少話到畀大家知，佢哋嘅信心跌落谷底。唔止球員散晒，領隊史高拉利都唔好得去邊，雖然佢唔想辭職，但有傳足總會喺季軍戰後炒佢魷魚。而且據巴媒《O Tempo》民調顯示，有34%球迷希望哥迪奧拿接掌巴西，高士路教頭馬些路奧利華拉（19%）同智利領隊森柏奧利（13%）就緊隨其後，球迷都唔想見到「大菲」，今晚仲有咩心機教？

講真吖，唔通攞番個季軍，球迷就收貨咩，快快趣趣散場解散算啦！場波最後踢成點無人知，但我估兩隊上半場肯定會喺輸波嘅陰影下睇定啲，博個半場細，踢完上半場睇吓即場投X有咩好？先再出手都唔遲。

由揭幕戰開始我場場都睇晒，晚晚捱夜搞到殘晒，所以我決定之後嚟個「一個人旅行」叉叉電，支持我嘅朋友，新球季見啦！
翼鋒比併

迪比

代表國家隊上陣 10次

場數 4

入球 2球

上陣時間 173分鐘

平均個人突破 1.75次

射門總次數 6次

（命中率） （83.3%）

犯規 3

平均個人衝刺 22.75次

平均跑動 4889.5米

最高跑動時速 30.71公里
侯克

代表國家隊上陣 40次

場數 5

入球 0球

上陣時間 380分鐘

平均個人突破 2.4次

射門總次數 14次

（命中率） （57.1%）

犯規 8

平均個人衝刺 38.8次

平均跑動 7751.6米

最高跑動時速 30.35公里
Data King：季軍戰連開9口大

‧近10場比賽取得7勝2和1負。

‧球隊踢過3場季軍戰（1938年、1974年、1978年)，共攻入6球，失4球。

‧歷史上共11次出戰荷蘭，取得3勝5和3負。

‧世盃季軍戰已連續9屆開出全場大，近9屆對賽球隊共攻入36球，平均每場入4球。
Data King：荷蘭近10戰9成不敗

‧近10場比賽取得6勝3和1負。

‧今屆6場世盃賽事，全部開出半場和。

‧與巴西11場對賽中，兩隊共攻入30球，平均每場入2.72球。

‧荷蘭洲份為歐洲國家，世盃已連續8屆由歐洲球隊取得季軍。
乜都玩錦囊：玩埋2.25倍半和

巴西今場有隊長堤亞高施華復出，條防線應該會穩陣過上場對德國，不過，「森巴兵團」今屆鋒力真係不敢恭維，半場未必攻得入對手，加上荷蘭又冇乜心機踢呢場季軍戰，隨時歎慢板，所以2.25倍嘅半場和都博得過。