世界漫遊（彼德）蓮華生輝征英矚目

不死鸟

早前「蓮華生輝」贏KrisFlyer國際短途錦標之後，唔單止令佢重登高峰，依家仲成為全球現役國際評分最高嘅短途馬，亦因為呢次嘅勝利，激發起幕後遠征嘅雄心。

　　記得姚本輝賽後接受當地傳媒訪問時表示，佢會先畀匹馬唞番八個禮拜，不過相隔唔夠一星期，幕後人卻改變初衷，毅然轉戰英倫角逐金禧錦標。到底「蓮華生輝」呢次英國之行，可唔可以好似新加坡之旅咁成功呢﹖當然贏輸已屬後話，但單論戰意肯定百分百，因為若然要取得一張入場券，馬主就要先交四萬幾歐元額外報名費，你都咪話唔肉赤。

　　難得「蓮華生輝」應戰，英國馬圈亦高度重視，尤以當地合法外圍莊家反應最快，一收到消息後，即刻修改金禧錦標嘅暫定賠率，並將「蓮華生輝」列為六倍大熱，取代澳洲代表Scenic Blast大熱地位，另比歐洲短途馬王「黃金商人」同南非馬「卡通飛機」嘅獨贏賠率熱咗一半。