撐最強德國完勝奪冠

猪拉多纳

美斯1個點打11個？阿根廷氣數盡

世界盃決賽今夜爆發！德國同阿根廷會師里約熱內盧馬拉簡拿球場合演終極一戰，德國喺準決賽7比1狂數東道主巴西踢出驚世一役，足以震懾晉級過程跌跌撞撞嘅阿根廷。阿根廷整體級數、默契、狀態同體能都無法同德國相提並論，呢場決賽重點係阿根廷美斯單挑整支德國團隊，雖然呢位「球王」喺分組賽至16強一直單天保至尊，但近兩場淘汰賽所見其鋒芒已經稍斂，且走動極少，今仗好難旨望佢1個打贏11個，黑柴相信德國可喺90分鐘內解決對手捧盃，推介2.04倍主勝。

（無綫翡翠及明珠台、ＴＶＢ13及19、now 818及840周一凌晨3時直播）
級數體能瓣瓣都贏

德軍自06世盃由奇連士文同勒夫聯手改革後，經歷兩屆歐國盃同上屆世盃，一班小將已經踏入最成熟嘅黃金期，且陣中人才濟濟，兵源同調動方面都贏晒其餘對手，領隊勒夫更大膽留前鬥後，喺分組賽同16強賽事排陣同用人都亂點鴛鴦，但去到最後3場比賽至起用最強陣容，8強戰小勝法國已見球隊防線比前穩健得多，準決賽對巴西更向舉世顯示其瘋狂進攻本錢，今仗係佢哋連續第3場用相同陣容出擊，球隊喺今屆賽事合共轟入17球，中前場除咗每個球員互相配合組成威力極強嘅「攻擊群」，球隊喺頭4場比賽踢法似足哥迪奧拿嘅拜仁，但近兩場就似足高普着重效率嘅多蒙特，而且一仗比一仗進步。最重要係擺正心態，對今仗抱有充足信心之餘並唔會有任何鬆懈。

阿根廷經過6場苦戰，晉級過程一路都未輕鬆過，包括兩場踢足120分鐘比賽後，體力恢復方面遠比有多一日時間休息嘅德軍吃虧，尤其美斯喺近仗所見基本上行多過踢，喺佢零參與防守下，其餘中後場球員要付出嘅體力將會更大。
有晒部署招呼球王

德軍今仗已為針對美斯做好準備，即使佢擔任前鋒，德國4名守將都會保持原有位置，只派基迪拉同舒韋恩史迪加輪流招呼佢，唔會打亂防線布陣。

阿根廷喺世盃展開前被譽為擁有最恐怖攻擊力球隊，但最具速度嘅兩大主將阿古路同迪馬利亞一直受傷患困擾下，前線威力大減，希古恩同拿維斯又一直未能進入狀態，上仗悶和荷蘭射贏12碼，即使美斯亦貢獻有限，正如橙軍主將洛賓所講，荷蘭比阿根廷更值得打入決賽，黑柴相信呢支阿根廷氣數已盡，今晚難敵擁有強大實力同自信嘅德國。
蘇斯黑柴推介

德國 勝