精彩紛呈這屆世盃太難忘

猪拉多纳

世上冇完美無瑕嘅球隊，但唔代表今屆世盃冇睇頭，甚至可以話係包羅萬有，波如人生高低起跌嘅縮影。回顧初賽至決賽嘅喜怒哀樂，哥斯達黎加竟然能喺「死亡D組」力壓烏拉圭、英格蘭、意大利等勁旅首名出線，真係估佢唔到。德國名宿奇連士文為一展抱負，寧願執教二線球隊美國，用自己嘅理念重新打造球隊，踢法進取，佢又對勝負處之泰然，甚至令被喻為「足球沙漠」嘅美國，掀起當地人民對呢項運動嘅熱潮，「奇哥」果然魅力沒法擋。

東道主巴西對冠軍志在必得，以防守配合「新比利」尼馬嘅反擊戰術，本來順風順水，但4強缺少受傷嘅「新比利」及堤亞高施華停賽，主帥史高拉利卻不自量力玩搶攻，最終被德國大炒七個一皮絕對咎由自取。至於實力麻麻嘅荷蘭在老帥尹戈爾運籌帷幄之下，多番出色臨場調動，包括8強對哥斯達黎加換入後備龍門告魯爾救12碼嘅奇招，實令人拍案叫絕。

在人人皆防守嘅現代足球，除咗各隊針對性嘅嚴密部署值得一讚外，一眾「神龍」奧祖亞（墨西哥）、基羅拿華斯（哥斯達黎加）、哥迪奧巴禾（智利）、侯活（美國）等亦值得太家致敬，其中寂寂無聞嘅「墨國Sam哥」奧祖亞飛撲尼馬頭槌，精彩度媲美70年英格蘭鋼門哥頓賓士勇救巴西球王比利勁頂嘅「世紀一撲」，令佢一夜爆紅。今屆世盃實在有太多令人難忘嘅時刻嘞！真係「神奇！頂級！超卓！」
決賽場合冇高低

至於今晚王者之戰，無論係備受睇好嘅德國，抑或有美斯壓陣嘅阿根廷，殺入決賽均屬實至名歸，前者人才輩出戰術多變，高路斯、湯馬士梅拿、卻奧斯等弗到爆火力全開，上仗大炒巴西霸氣盡現；後者在門將羅美路同鐵血防中馬斯真蘭奴鎮守下，防線固若金湯，仲有美斯嘅神來之筆，兩軍各有優點，加上比賽係一場還一場，預計呢場1990年決賽翻版戰，會踢得非常緊湊。