諾在其中:（馮諾嘉）宇宙良駒信得過

不死鸟

騎師魯柏軒冇申請續牌，上季佢已經要為續牌向馬會提交理由，今季佢嘅成績同樣低落，事實勝於雄辯，相信呢點係佢唔申請續牌嘅主因。小妹身邊唔少朋友係熱愛賽馬之人，話魯柏軒不求上進，但小妹好明白賽馬只係騎師嘅工作，喺事業上努力未必得到應得嘅成果，小妹工作多年，眼見好多身邊嘅朋友都係浮浮沉沉，佢哋冇發奮咩﹖

        季內做過多個騎師嘅專訪，只有嗰班初踏足馬場嘅見習生對賽馬有滿腔熱誠，其餘嘅唔少已經覺得疲倦同氣餒，喺呢個爭名逐利嘅圈子，要有好成績又何只騎得好咁簡單，要同韋達、柏寶爭坐騎，華籍騎師未跑就已經輸咗一半，我相信一匹好嘅坐騎係佔贏馬主因嘅七成，其餘三成至係騎師嘅功架，練馬師部署等等，經常手執曳馬又點樣求上進呢﹗

        外地賽馬有唔少馬主同練馬師會保護本土騎師，偏偏香港份外崇洋，到尾魯柏軒只係得隻「八運寶」叫做雪中送炭，早前同佢傾過偈，明白佢對賽馬仍充滿鬥志，此處不留人，惟有打算單人匹馬去新加坡闖一闖。

        今次心水馬係第三場泥地千二米嘅「宇宙良駒」，韋達上場同程跑第二而今次唔放手，信佢應該冇錯。