世界漫遊:（彼德）包裝大師爆冷單Ｑ

不死鸟

 日前姚本輝決定安排「蓮華生輝」展開英國之行，而被此駒打破不敗身嘅新加坡馬「火箭人」近日亦落實遠征，目標直指澳洲一系列短途大賽。

        「火箭人」呢匹三歲澳洲馬，響KrisFlyer短途錦標雖然畀「蓮華生輝」中止連勝紀錄，但係星味冇因此減退，維省賽馬會賽事總經理Leigh Jordon睇完KrisFlyer短途錦標之後，連日嚟主動接觸「火箭人」練馬師紹爾，力邀佢派此駒出席年底舉行嘅春季嘉年華賽事。

       Leigh Jordon仲話若然「火箭人」去澳洲上陣，必可令嘉年華更具話題性，而佢哋嘅初步構思就係邀請「火箭人」出爭9月25號響滿利谷馬場上演嘅萬利嘉多錦標，之後再跑世界短途挑戰賽尾二站賽事、前身係時代報經典錦標嘅Patinack Farm Classic，兩場都係草地千二米一級賽。據聞紹爾聽完Leigh Jordon嘅提議都心郁郁，但要同馬主商討後至有決定。

        講番聽日重頭戲遮打盃，呢場褪色嘅馬王大賽，歷來出現過唔少精采鏡頭，最經典當然係95年「有性格」同「開心人」呢對摩廐馬同室操戈、鬥至平頭冠軍嘅一幕，而上屆「包裝大師」力壓「爆冷」亦相當震撼。

        今屆遮打盃賽事，「包裝大師」同「爆冷」呢對歡喜冤家再度碰頭，筆者估計頭馬仍係非此即彼，可以單Ｑ捧場。