曼城隨時中伏

猪拉多纳

遠征肯薩斯烏雲蓋「月」

踢完世盃，球迷又要飽受餓波之苦，惟有睇住熱身賽頂住癮先，好彩今夏有國際冠軍盃呢項重頭戲，戲碼超強，皇馬、曼聯、曼城、利物浦、AC米蘭等歐洲勁旅都有參賽，相當有睇頭。而喺國際冠軍盃開打前，上季英超盟主曼城聽朝先會喺美國同美職二哥肯薩斯體育會拍跳，睇牌面就梗係曼城贏晒，但講狀態肯薩斯一定秤先，今場科娜力撐狀態托弗嘅體育會讓球勝！（now 621周四早上9時直播）
驚傷唔敢搏到盡

「藍月亮」日前已經飛去肯薩斯城國際機場，準備鬥肯薩斯體育會，但赫特、大衞施華、耶耶托尼、占士米拿、迪斯高等一眾世盃主力球員就唔喺架機度，要過兩日先同球隊會合，今場肯定唔會「夫添」出戰。

雖然話曼城人才濟濟，冇咗呢班主力都夠砌。不過，最弊係呢支億萬大軍踢完上場難免有啲心理陰影，「藍月亮」話咁快就成為熱身賽受害者，西班牙前鋒尼格度喺上仗熱身賽對赫斯受傷，證實右腳跖骨骨折，要長抖2至3個月，好大機會無緣亮相季初對利物浦、阿仙奴同車路士等英超大戰，認真大鑊。依家曼城見過鬼仲唔怕黑咩，你叫班球員今場仲點敢搏命踢呀？
玩埋第一隊入球

肯薩斯體育會貴為上季總冠軍、今季美職二哥，實力當然有番咁上下，呢隊波近況可謂弗到爆，近5場成績係4勝1和，上場仲贏埋勁敵洛杉磯銀河，士氣大振，如果今場贏埋富豪球隊曼城，仲唔威過威士忌？而且肯薩斯體育會喺呢5場波都係先開紀錄嗰隊，除咗揀讓球主勝外，敢搏嘅朋友更可以冷敲埋體育會第一隊入球添﹗