松鼠+1捉鹿脫角

猪拉多纳

小休回勇 射手撻番着

今日下晝日職好戲連場，其中直播賽事「四哥」鹿島鹿角主場迎戰下游分子大宮松鼠值得留意。睇排名看似強弱懸殊，但鹿角演出大跌Watt，撞正復勇嘅松鼠唔易啃，仲要讓波點買得落手，梗係捧番松鼠讓球客勝喇！

（有線64及203台周三下午6時直播）

鹿島鹿角依家排喺聯賽排第四好似好醒，其實連同日聯盃等近九場正式賽事，佢哋竟然輸咗五場，之前因為世盃關係，國內賽事休戰近一個月，以為鹿角可藉此調整一下狀態，點知該隊於月中球季重開冇耐，先喺日皇盃互射12碼遭低組別球隊ＦＣ仙台踢出局，嚴重打擊士氣，日前喺聯賽又幾經辛苦才於末段逼和ＦＣ東京，巴西中場路爾斯艾拔圖更領紅被逐，仲未走出谷底兼有主力坐波監點捧呀？

相反，大宮松鼠雖然排緊尾二，但經過小休後明顯有番啲起色，不但喺日皇盃輕鬆晉級，剛於聯賽硬撼上季盟主廣島三箭，佢哋喺落後三粒嘅劣勢，下半場竟可一鼓作氣連追三球，搶番一分令軍心大振，更重要係斯洛文尼亞前鋒隆比真歷打破多場聯賽入球荒，信心返晒嚟；此消彼長之下，鹿角邊有本錢讓波呀？松鼠仲有得受讓咁筍，2.42倍嘅讓球客勝不容錯過。
飛腳主場搵心跳報仇

同時間開波嘅另一場直播賽事，大阪飛腳主場火併清水心跳，儘管前者曾於日聯盃客場不敵心跳，不過佢哋連熱身賽在內喺自己地頭已豪取八連勝，正宗地頭蟲，射手宇佐美貴史上仗聯賽對甲府風林又先開紀錄，狀態幾弗，遇上作客腳軟嘅心跳，可以報番盃賽一箭之報，主W有1.87倍咪走雞。（有線62及202台周三下午6時直播）