利記大火氣 喪攻奧林比

猪拉多纳

FIFA放生咬人蘇嬲到震

國際冠軍盃聽日繼續展開激戰，利物浦喺美國芝加哥軍人球場鬥B組對手奧林比亞高斯。紅軍因為射手蘇亞雷斯嘅停賽令忍痛割愛賣人，點知轉頭傳出「咬人蘇」可能減刑消息，肯定成肚火想數胡出氣。撞啱對手奧林比亞高斯亦上晒力，兩雄相遇梗係捧1.65倍入球大。

（有線61、201周一早上6:00直播）
拉爾拉拿膝傷抖6周

「咬人蘇」喺世盃咬人後，畀國際足協（FIFA）重罰佢冇得參與足球活動4個月，紅軍迫於無奈將佢賣畀巴塞，日前傳出FIFA有意將刑罰改為只限國家隊，體育仲裁法庭又放風會為「阿蘇」減刑。紅軍聽到條氣點會順，班主約翰亨利早前接受《NBC》訪問時，話球隊冇咗阿蘇一樣咁猛火，成班球員收到Order邊敢唔攻先？

事實上，利物浦今季亦做足準備，先後羅致列基林拔、拉爾拉拿、拿沙馬高域等猛將，加埋原有主力史杜列治、菲臘比古天奴可以上陣，鋒力依舊得人驚。雖然拉爾拉拿因膝傷要抖6星期，英超季初比賽唔使預佢，但盛傳拿沙馬高域會擔正，相信佢會搏盡留個好印象畀領隊羅渣士。
奧林比大炒AC狀態勇

不過紅軍後防問題始終冇改善，上仗鬥羅馬完場前就走漏對方前鋒波里路，結果以0:1輸波。利物浦防線一直係佢哋嘅死穴，偏偏班高層仲未肯增兵改善，睇怕條防線會繼續穿窿。

對手奧林比亞高斯上仗大炒AC米蘭3:0，打起球員信心之餘，亦證明呢支希臘班霸狀態唔差，對住紅軍唔慌會縮。以紅軍條豆腐防線，想保清白之身有難度囉！