曼城「讓客」得米

猪拉多纳

未慣恩沙基新戰術 AC閉翳

國際冠軍盃喺美國踢得如火如荼，上季英超冠軍曼城今輪會同意甲褪色勁旅AC米蘭上演矚目一戰。曼城雖然冇咗前鋒尼格度，中場大腦拿斯尼又未必出得，但係另邊廂AC仲未適應新帥恩沙基嘅戰術，「藍月亮」要贏AC話咁易，2.72倍「讓客」博得過！

（有線61、201及中央5台周一凌晨4:00直播）

曼城未開季就有尼格度跖骨骨折，要抖成3個月，肯定趕唔切喺英超開鑼前復出。除此之外，「藍月亮」中場猛將拿斯尼則有輕傷，主帥比歷連尼今戰或者會收起佢，等呢位中場大腦可以專心養傷。同時阿古路、費蘭甸奴、高柏尼、薩巴列達同迪米捷利斯嘅「世盃5人組」，亦要「叉足電」先會披甲，今場都唔會見到佢哋落場。
「藍月」小將伊希納丘爭士哥

雖然成半隊正選唔踢，好在曼城勝在兵多將廣。由波圖加盟嘅費蘭度法蘭斯高體力好、跑動多，真係去到邊都可以見到佢，今場正選走唔甩。另方面17歲嘅小將伊希納丘（圖左），喺上場對肯薩斯體育會表現出色又有「士哥」，連比帥都認為呢個後生仔未來大有作為，已經決定返到英國之後就同佢正式簽約。伊希納丘呢場波實搏命爭表現以求一紙「肥約」，拍住祖維迪呢啲「大佬」攻堅，有望再爭士哥啦！

至於對手AC米蘭，喺恩沙基麾下似乎仲未熟習新戰術，上場畀奧林比亞高斯大炒3粒，攻勢完全冇威脅。恩沙基都承認班球員態度正確，但係狀態不足。「紅黑兵團」有心無力，今場對住曼城都係等數居多！
賽制

國際冠軍盃：8支參賽球隊分兩組，各對賽1次，若同分以得失球差決定排名，兩組首名入決賽爭冠軍。

阿根廷盃：今輪為第7圈賽事，法定時間內打和，即互射12碼決勝負。