雌狼+1撲擊皇馬

猪拉多纳

明早另一場國際冠軍盃A組次輪賽事，皇馬喺美國達拉斯棉花碗球場火併「雌狼」羅馬。雖然「銀河艦隊」頭號王牌C朗已經歸隊，但佢肯定今仗冇份披甲，呢支上屆盟主靠加里夫巴利帶住班新仔效果麻麻，相反羅馬對待此盃賽認真得多，中場比真歷上仗更入咗個超級笠射，技驚四座，受讓之不妨揀讓球客勝。

（有線61及201台周三早上9時15分直播）

先旨聲明，斯維唔係話皇馬對國冠盃唔認真，只係佢哋有太多國腳之前要出征世盃，球員唔係機器，梗係要抖到夠迎接新球季喇，因此佢哋喺國冠盃首輪對住國米嗰陣，主帥「肥安」安察洛堤依然將卡斯拿斯、沙治奧拉莫斯、沙比阿朗素等主力雪藏，派出「大聖爺」加里夫巴利及艾斯高帶領一班新仔搏殺。

除咗「大聖爺」入咗球靚波外，皇馬整體發揮非常一般，最終互射12碼輸埋添；頭號王牌C朗上周六已歸隊，但佢喺上季季尾及世盃帶傷上陣，其膝頭傷患仲未好番，為免要佢再冒險，唔單止今仗唔使預佢，甚至嚟緊對曼聯嘅分組賽都會倦勤，預計「肥安」仍會續用迪亞高洛蘭迪、魯賓蘇利安奴等新仔。
強陣出擊箍死「大聖爺」

羅馬首仗以2比3不敵曼聯，主帥魯迪加西亞先後用咗迪斯度、托迪、貝拿迪亞、比真歷等主力上陣，連新加盟嘅施度基達及艾殊利高爾都有份落場，不過佢哋喺落後三球劣勢下都冇放棄，仲追番兩粒，可見呢支意大利首都球隊勁有鬥心，其中比真歷離門60幾碼嚟個超級笠射破網，精彩程度媲美「萬人迷」碧咸18年前對溫布頓嘅世紀笠射，證明羅馬眾將比「銀河艦隊」更快上力，只要佢哋加強力度嘜實「大聖爺」，要贏皇馬唔算困難。

今場讓球主客和皇馬要讓一球，純粹名牌效應，羅馬有得受讓咁筍，讓球客勝咪錯過。