尹戈爾施魔法玩謝國米

猪拉多纳

科娜問過好多曼聯朋友，大多數都認為佢哋嘅愛隊喺「新魔王」尹戈爾帶領下能夠喺新一季英超坐亞望冠，咁有信心？不過睇完尹帥帶隊喺美國踢嘅兩場波，又好難怪呢班「曼迷」會信心爆棚嘅，科娜不得不承認「紅魔鬼」的確係幾堅，「橙化」後嘅紅魔第一場對洛杉磯銀河即狂派七蛋，跟住再喺國際冠軍盃A組首仗擊敗羅馬，重拾王者霸氣。尹帥咁有料，聽朝呢支「橙化紅魔」將會對住另一支意甲球隊國際米蘭；識揀，梗係揀曼聯贏啦！

（有線61及201台周三早上7時直播）
朗尼桑馬達撻番着

其實一路有睇開本報波經嘅朋友大概都知道曼聯喺尹戈爾領軍下有咩變化，包括兩場熱身賽都採取荷蘭出戰世盃嘅「352」陣式或者傳統嘅「343」陣式，將紅魔「橙化」，兩套陣式都見成効，亦成功令朗尼、桑馬達大爆發；前者兩場共入四球，後者重返進攻中場位置即鹹魚番生，如魚得水，又助攻、又入波。

雖然喺遊戲機入面要用呢兩個隊中數值最高嘅人入波助攻易過借火，但現實中係無論幾勁嘅人都要有領隊識得點用佢哋，先可以發揮球員真正嘅實力，需知道佢兩位喺「足球天才」莫耶斯手下只係平庸到極點嘅球員，朗尼嘅表現唔值得攞30萬鎊周薪，而桑馬達亦配唔起3,700萬鎊嘅身價，所以話曼聯依家「魔性」回歸，尹帥一定係居功至偉﹗

意甲褪色勁旅國際米蘭依家處於重建期，完全冇星味可言，球員質素同曼聯比有一定嘅距離，後防更係靠晒今場倒戈紅魔嘅尼曼查維迪支撐。可能你會反駁話呢支冇星味嘅「藍黑兵團」上場都和到星光熠熠嘅皇馬喎，不過如果皇馬下半場唔係hea踢，國米又點憑十二碼射贏對手攞番兩分呀？唔好諗咁多嘞，捧曼聯贏波啦！