國民會留晒力受讓睇定食

猪拉多纳

聽朝南美自由盃4強次回合，烏拉圭勁旅迪芬沙士砵亭返主場迎戰巴拉圭球隊國民會。雖然迪芬沙士砵亭落後0比2，背水一戰必定搶攻，奈何烏拉圭聯賽仲未開咧，狀態未谷起，國民會日前喺聯賽留晒力，要守住領先優勢冇難度，仲有得受讓不容錯過。

（周三早上8時15分開賽，馬會網上文字直播）
迪芬沙士砵亭聯賽未開缺態

呢個對賽原本預計雙方勢均力敵，但從首回合國民會以2比0輕取迪芬沙士砵亭之役可見，前者喺控球率略為輸蝕嘅情況下，靠住銳利反擊殺到迪軍措手不及。最重要係迪芬沙士砵亭所屬嘅烏拉圭甲組聯賽仲未開鑼，除咗自由盃賽事外，佢哋對上一次正式比賽，要數到5月中嘅事，眾將喺久疏戰陣下，依家未谷起狀態乃人之常情。

國民會喺剛開咧嘅聯賽，意外地慘吞三蛋咁肉酸，其實同上周中首回合對迪芬沙士砵亭嘅陣容相比，佢哋竟然進行大輪換，包括中場發電機馬高斯利華路斯及祖利安賓尼迪斯獲得休息，抖到夠嚟迎接呢場作客大戰。況且國民會揸住兩球在手，面對谷唔起嘅迪軍，絕對唔使急睇定食，甚至為保住領先優勢殺入決賽，死守隨時唔奇，有得受咁筍，讓球客勝有買趁早，不妨吼埋細盤。